Endi zań jobalary ýákiletti organnyń web-saıtynda jarııalanady - Májilis
ASTANA. Qyrkúıektiń 22-si. QazAqparat /Qanat Mámetqazyuly/ - Búgin Parlament Májilisiniń jalpy otyrysynda palata depýtattary «Normatıvtik quqyqtyq aktiler týraly» Qazaqstan Respýblıkasynyń zańyna ózgerister men tolyqtyrýlar engizý týraly» zań jobasyn ekinshi oqylymda maquldap, qujatty Senattyń qaraýyna jiberdi.
Atalǵan zań jobasy qoldanystaǵy barlyq zańdar men zań aktileriniń qabyldanýy men qoldanylý jáne kúshin joıý tártibin reglamentteıdi. Qujat memlekettik organdardyń norma shyǵarý qyzmetin jetildirýge baǵyttalǵan. Sondaı-aq ol memlekettik organdardyń normatıvti-quqyqtyq aktilerdi qabyldaý jónindegi ókilettikteriniń ara-jigin ajyratady. Qujatqa sáıkes, memlekettik organdar ózderiniń zań jobalaryn arnaıy veb-saıtynda ornalastyrýǵa mindetti bolady. Mundaǵy maqsat osy shara arqyly zań jobalarynyń erejelerin qoǵamdyq birlestikter men úkimettik emes uıymdarmen jáne buqara halyqpen birlesip talqylaý bolyp otyr.
Sonymen qatar, norma shyǵarý qyzmetin sapaly júrgizý jáne memlekettik organdardyń artyq norma shyǵarýyn boldyrmaý maqsatynda zań jobasynda ony iske asyrýǵa qatysty barlyq normatıvtik-quqyqtyq aktilerdi usyný erejesi engizilip otyr.
