Endi Ulttyq ǵylym akademııasynyń basshysyn Prezıdent taǵaıyndaıdy

ASTANA. QazAqparat – Memleket basshysy «QR Ulttyq ǵylym akademııasynyń keıbir máseleleri týraly» Jarlyqqa qol qoıdy. Endi bul uıym QR Prezıdentiniń janyndaǵy Ulttyq ǵylym akademııasy bolyp ózgerdi, dep habarlaıdy QazAqparat tilshisi.

«Qazaqstan Respýblıkasy Ulttyq ǵylym akademııasynyń mártebesin joǵarylatý maqsatynda «Qazaqstan Respýblıkasynyń Prezıdenti týraly» QR Konstıtýtsııalyq zańynyń 10 jáne 33-baptaryna sáıkes qaýly etemin:

«QR Ulttyq ǵylym akademııasy» kommertsııalyq emes aktsıonerlik qoǵamyn Qazaqstan Respýblıkasy Prezıdentiniń janyndaǵy «Qazaqstan Respýblıkasynyń Ulttyq ǵylym akademııasy» kommertsııalyq emes aktsıonerlik qoǵamy etip qaıta ózgertsin. Ulttyq ǵylym akademııasynyń prezıdentin QR Prezıdenti laýazymǵa taǵaıyndaıdy jáne laýazymnan bosatady dep belgilensin», - delingen Memleket basshysynyń Jarlyǵynda.

Jarlyq jarııalanǵan kúnnen bastap kúshine enedi.

Eske sala keteıik, byltyr 1 maýsymda Qazaqstannyń Ulttyq ǵylym akademııasynyń 75 jyldyq mereıtoılyq sessııasynda Prezıdent Qasym-Jomart Toqaev bıýdjetten qarjy bólip, memlekettik mártebe bere otyryp, Akademııanyń rólin arttyrýdy tapsyrǵan bolatyn.

«Qara shańyraqtyń rólin arttyrý asa mańyzdy. Sondyqtan, oǵan memlekettik mártebe beremiz jáne bıýdjet esebinen qarjylandyramyz. Onyń qazir atqaryp otyrǵan qyzmetinen basqa da mindetterin naqty belgileý qajet. Atap aıtqanda, ǵylymı basymdyqtardy dál osy qurylym aıqyndaýy kerek. Arnaýly granttar, stıpendııalar jáne syılyqtar taǵaıyndaý quzyreti de Akademııaǵa berilgeni jón», - degen edi Prezıdent.

Keıin akademıkterdiń usynysy boıynsha Úkimet UǴA-ny transformatsııalaý jónindegi memlekettik komıssııa qurdy. Onyń negizgi mindeti Akademııa qyzmetiniń negizgi baǵyttary boıynsha biryńǵaı ustanymdy qalyptastyrý boldy.