Endi tólqujatty kez kelgen HQKO-dan alýǵa bolady
ASTANA. QazAqparat - Qazaqstandyqtar pasport pen jeke kýálikti alý úshin turǵylyqty jerindegi nemese tirkelgen mekenjaıy boıynsha ornalasqan HQKO-men qatar, elimizdiń kez kelgen halyqqa qyzmet kórsetý ortalyǵyna qujat tapsyra alady.
QR Baılanys jáne aqparat agenttiginiń Elektrondyq qyzmetterdi jáne halyqqa qyzmet kórsetý ortalyqtaryn damytý departamentiniń dırektory Abylaıhan Ospanovtyń aıtýynsha, «bul mehanızm QR Іshki ister mınıstrligimen belsendi túrde talqylanyp, iske asyryldy. Búgingi kúni barlyq máseleler retteldi jáne HQKO-daǵy kóshi-qon polıtsııasynyń qyzmetkerleri turǵyndardan jańa kýálik nemese pasport rásimdeý úshin qujat qabyldaýdy bastady. Bul qyzmet azamattarymyzdyń ýaqytyn jáne qarjylyq shyǵyndaryn aıtarlyqtaı únemdeıdi, mysaly, jańa jeke kýálik nemese pasport alý úshin tirkeýde turǵan oblysqa, aýdanǵa barýdyń qajeti joq».
Sondaı-aq, Agenttiktiń turǵyndar arasynda úlken suranysqa ıe memlekettik qyzmetterdi de tirkelgen jeri nemese turǵylyqty jerine baılanystyrmaı-aq, kez kelgen HQKO arqyly berý máselesin memlekettik organdarmen birge qarastyrýda. «HQKO»RMK aqparatyna sáıkes, osy jyldyń basynan beri 600 myńnan astam adam elimizdiń Halyqqa qyzmet kórsetý ortalyqtaryna qujattandyrý qyzmetin alýǵa ótinim bildirgen. «Aıtalyq, siz Aqtóbe qalasynda nemese basqa eldi mekende turyp jatyrsyz, biraq naqty ýaqytta Almaty qalasynda júrsiz. Sizge pasport nemese jeke kýálik alý úshin ózińizdiń qalańyzǵa barýdyń qajeti joq. Pasport nemese jeke kýálik alýǵa ótinimdi Almaty qalasynda ornalasqan kez kelgen HQKO-ǵa bere alasyz», - dep túsindirdi «HQKO»RMK dırektory Murat Aıtýǵanov. Aıtyp ótý kerek, azamattyń jeke basyn kýálandyratyn jańa qujatty alýǵa ótinimdi aty-tegin aýystyrǵan, qujat búlingen, pasportty joǵaltqan, qujattyń merzimi ótip ketken jáne t.b. jaǵdaılarda turǵylyqty jáne tirkelgen mekenjaıyna qatyssyz, kez kelgen HQKO-ǵa berýge bolady. Al, qosymsha tekserý júrgizý nemese sheshim shyǵarý qajet bolǵan jaǵdaıda jańa qujat azamattyń tirkelgen mekenjaıy boıynsha ǵana beriledi. Qujatty ázirleý ýaqyty týraly aqparatty HQKO-ǵa ótinim berý kezinde bile alasyz.
