Endi tek Qazaqstannyń azamattyǵy qujaty boıynsha ǵana áleýmettik kómek beriledi
ASTANA. Qazannyń 29-y. QazAqparat /Marlan Jıembaı/ - Búgin www.bnews.kz portalynda ótken Online-konferentsııa barysynda QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishevke jalǵan qujat jasaıtyndar, oralman atyn jamylyp, aqsha urlaıtyndar boı kórsetip qalyp jatady jáne ony aldaǵy ýaqytta boldyrmaý úshin qandaı sharalar qoldanylýda, degen suraq kelip tústi.
«Bul quqyq qorǵaý organdarynyń jumysy. Degenmen buqaralyq aqparat quraldary arqyly jalǵan qujat jasaıtyn qylmystyq toptardyń bolýy elge aıan bolyp otyr. Úkimet osy máselege jiti kóńil aýdarýda», dedi komıtet tóraǵasy.
Onyń aıtýynsha, bul qoldanystaǵy zańnyń álsiz tustarynyń barlyǵynan, al qazirgi ázirlenip jatqan jańa zań jobasynda osy jaıttar tolyǵymen qarastyrylǵan. Qazirgi zańnamada adamdardyń ózderi kelmeı-aq senimhat arqyly qujat tapsyrýyna múmkindik berilgen edi. Azamattyqqa qujatyn tapsyrǵannan keıin sol anyqtama arqyly tıesili memlekettik áleýmettik kómek berilip kelgen. Aqsha qaltaǵa túskennen keıin keıbir azamattardyń qaıtadan eline nemese basqa jaqqa ketip qalatyn oqıǵalary kezdesken.
«Azamattyǵy, qujaty shyǵady, al alatyn adamy joq. Endi tek azamattyǵy shyqqannan keıin, Qazaqstannyń azamattyǵyn rastaıtyn qujatymen ǵana memlekettik áleýmettik kómekti alatyn bolady. Biz Kóshi-qon zańynda osy normany túzetip jatyrmyz. Qazir ótken jyldary jalǵan qujattarmen Qazaqstanǵa kelgen azamattar da anyqtalyp otyr. Tipti keıbireýler eki márte áleýmettik kómek alǵan jaıttar da kezdesedi. Osynyń barlyǵy jańa zań jobasynda, qujattarda jóndelip, osy máseleler tóńireginde úlken jumystar jasalyp jatyr», dedi Q.Ábishev.
