Endi sotta qaralatyn asa aýyr qylmystyq isterge 12 alqabı múshesi qatysady
Májilis depýtattary QR Qylmystyq-protsestik kodeksine osyndaı ózgeris engizýdi usyndy.
«Birinshi satydaǵy sottarda qylmystyq isterdi qaraýdy sýdıa jeke-dara, al aýyr jáne asa aýyr qylmystar boıynsha aıyptalýshynyń ótinishhaty boıynsha quramynda 1 sýdıa men 12 alqabı bolatyn alqabılerdiń qatysýymen sot júzege asyrady», - dep jazylǵan Qylmystyq-protsestik kodekstiń jańa redaktsııasynda.
Qujattta jazylǵandaı, bul baǵytta ózgeris jasaý úshin jetekshi álem elderiniń tájirıbesi negizge alynǵan. Depýtattar paıymynsha, alqabıler soty eń ádil sheshimderdi qabyldaýǵa qabiletti.
«Advokatýrany damytý tujyrymdamasynyń 4-bóliminiń 4-tarmaǵy alqabıler sotyna sottylyǵyna jatatyn isterdiń sanattaryn keńeıtý qajettigin kózdeıdi. Álemniń jetekshi elderiniń jınaqtap qorytylǵan tájirıbesi alqabıler soty eń ádil sot sheshimderin qabyldaýǵa qabiletti ekenin kórsetedi. Alqabıler sotynyń sottylyǵyna jatatyn ister sanattaryn odan ári keńeıtý, onyń ishinde alqabıler sotynyń isterdiń keıbir sanattaryn qaraýy boıynsha negizsiz shekteýlerdi qaıta qaraý jolymen keńeıtý qajet. Budan basqa, alqabılerdiń klassıkalyq sotyna tán elementterdi, onyń ishinde tóraǵalyq etýshi sýdıa bolmaǵan kezde jáne onyń yqpalynsyz alqabılerdiń sheshim qabyldaýyn qamtamasyz etý jónindegi elementterdi zańnamalyq deńgeıde eskerý qajet. Bul novella sot júıesin demokratııalandyrýǵa, oǵan qoǵamnyń senimin arttyrýǵa yqpal etedi», - dep túsindirme berilgen ózgeriske.
Sonymen qatar, depýtattar bastamasy boıynsha Qylmystyq kodekske advokattardyń qyzmetine zańsyz aralasyp, kúsh kórsetý arqyly isti burmalaýǵa májbúrlegenderdi jazaǵa tartýdy kózdeıtin norma engizilmek.
