Endi shaǵyn kólemdi kemelerdi tehnıkalyq kýálandyrýdyń qajeti joq

ASTANA. QazAqparat - Kásipkerlik qyzmetti retteýdi jetildirý máselelerine qatysty QR keıbir zańnamalyq aktileriniń ózgeristeri kúshine endi, dep habarlaıdy QazAqparat QR Investıtsııalar jáne damý mınıstrliginiń baspasóz qyzmetine silteme jasap. Oǵan sáıkes, shaǵyn kólemdi kemeni tehnıkalyq kýálandyrýǵa qatysty ýákiletti organnyń fýnktsııalary alynyp tastaldy. 

Endi shaǵyn kólemdi kemelerdi qoldaný qaýipsizdigin baqylaý tek baıqaý kezinde júrgiziledi.

Sonymen birge keıbir shaǵyn kólemdi kemelerdiń uzyndyǵy 20 metrge deıin baratyndyqtan, «palýbaly shaǵyn kólemdi keme» uǵymy engizildi. Olardyń tehnıkalyq kýálandyrylýy «Qazaqstannyń keme júzý regıstri» RMKK berildi.

Qazirgi ýaqytta Qazaqstanda tirkelgen shaǵyn kólemdi kemelerdiń sany 18 myńǵa jetedi. Olardyń 872-si - palýbalyq kemeler.

«Qabyldanǵan ózgerister jeke jáne zańdy tulǵalar men menshiginde shaǵyn kólemdi kemeleri bar kásipkerler úshin ákimshilik tosqaýyldardy 95 %-ǵa qysqartýǵa, gabarıtti jáne tehnıkalyq jaǵdaıy kúrdeli shaǵyn kólemdi kemelerdiń tehnıkalyq baqylaýyn ótkizýge, shaǵyn kólemdi flotta qaýipsizdik deńgeıin arttyrýǵa, bıýdjettik shyǵyndardy boldyrmaýǵa múmkindik beredi» delingen habarlamada.