Endi prokýrorlar 30 kúnnen artyq teksermeıdi
«Qazir prokýror qansha tekseremin dese de, ýaqyty shekteýsiz. Keıbir tekserýler bir jylǵa deıin jalǵasady. Óıtkeni talap joq. Endi onyń merzimi 30 kún ǵana bolady, keı jaǵdaıda ony tek bir aıǵa uzartýǵa múmkin bolady»-dedi J. Asanov.
Onyń sózine qaraǵanda, zań jobasynda tekseriletin sýbektilerdiń quqyqtary shegelep kórsetilgen. Buryn tekserýge jatatyn sýbektilerdiń quqyqtary qoldanystaǵy zańda qamtylmaǵan.
«Qoldanystaǵy zańda «prokýrordyń mindeti» degen bap múldem joq. Onda quqyq pen quzyrettilik eskerilgen. Zań jobasynda barlyǵyn ashyp jazdyq. Basty mindetimiz - halyqtyń senimine qyzmet etý» - dedi Bas prokýror.
Jaqyp Asanov endi prokýror óz betinshe bıznesti teksere almaıtynyn aıtqan bolatyn .
«Burynǵydaı basy men aıaǵy joq tekserý toqtaıdy. Qazir ІT-tehnologııa damyp bara jatyr. Kez kelgen zań buzýshylyqqa kabınetten shyqpastan taldaý jasap, sony anyqtaýǵa bolady. Ol úshin bilim men biliktilik kerek. Bul normanyń jaqsylyǵyn eń aldymen kásipkerler sezinedi. Endi prokýror óz betinshe bıznesti teksere almaıdy. Qylmys bolmasa, eshbir prokýror aralasa almaıdy», - dedi ol.
Aıta keteıik, Májilistiń jalpy otyrysynda palata depýtattary «Prokýratýra týraly» zań jobasyn maquldady. Atalǵan zań jobasynda joǵary qadaǵalaýdyń shekteri men nysandary aıqyndalǵan, onyń negizgi baǵyttary naqtylanǵan, memlekettik organdar men kásipkerlik sýbektiler qyzmetiniń zańdylyǵyn saqtaý úshin joǵary qadaǵalaýdyń shekaralary belgilendi.
