Endi orys tili 2-synyptan, aǵylshyn tili 3-synyptan bastap oqytylady – mınıstr

NUR-SULTAN. QazAqparat - Endi qazaq tilinde oqıtyn mektepterde 1-synyp oqýshysy bir ǵana tildi, ıaǵnı qazaq tilin meńgeredi. Orys tili 2-synyptan, aǵylshyn tili 3-synyptan bastap oqytylady, dep habarlaıdy QazAqparat.

Bul týraly Bilim jáne ǵylym mınıstri Ashat Aımaǵambetov nur.kz portalyna bergen suhbatynda aıtty.

«Zertteýler men taldaýlar júrgizgennen keıin biz birinshi synyp oqýshysyna birden 3 tildi meńgerý qıyn ekenin kórdik. Bul – tıimsiz. Biz bul máselege qatysty sheshim qabyldadyq. Endi qazaq tilinde oqıtyn mektepterde 1-synyp oqýshysy bir ǵana tildi, ıaǵnı qazaq tilin meńgeredi. Biz balanyń aldymen óz ana tilinde oqýdy jáne jazýdy úırenýi úshin tıisti jumys júrgizip jatyrmyz. Ekinshi synypta baǵdarlamaǵa orys tili, úshinshi synypta aǵylshyn tili qosylady. Orys tilinde oqıtyn mektepterde 1-synypta orys tili men memlekettik til, al 3-synyptan bastap aǵylshyn tili bolady», - dep túsindirgen mınıstr.

Ádisteme turǵysynan alyp qaraǵanda, bul – durys baǵyt ekenin de atap ótken vedomstvo basshysy. Mundaı zertteýler men usynystar buryn da bolǵan, sol sebepti ony engizý josparlanyp otyr.

Foto: NUR.KZ/Alena Býtenko