Endi Nıderlandyda páranja kııýge tyıym salynbaq
ASTANA. Qazannyń 1-i. QazAqparat - Inderlandyda qoǵamdyq oryndarda páranja kııýge tyıym salynatyn bolady. Nıderlandy Parlamenti Ókilder palatasynyń depýtaty jáne ásireońshyl «Azattyq partııasynyń» jetekshisi Gıırt Vılders osyndaı ýáde berdi, dep habarlaıdy France-Presse agenttigi.
Vılders bul málimdemeni jańa úkimetti qurý týraly partııalyq kelissózdiń qorytyndysyna arnalǵan baspasóz máslıhatynda málim etti. Qol jetkizilgen ishki saıası kelisimderge túsindirme bergen depýtat, jańa úkimettiń páranja kııýge tyıym salýmen qosa, Nıderlandyǵa ımmıgranttardyń aǵylýyn qatań shekteýdi josparlap otyrǵanyn málim etti.
Esterińizge sala keteıik, jaqynda Frantsııada páranjaǵa salynǵan tyıym kúshine enedi. Qyrkúıektiń 14-inde frantsýz Senaty musylman áıelderge kópshilik oryndarda páranja, shadra, nıkab sııaqty búrkemeler kııýge tyıym salatyn zań jobasyn biraýyzdan qabyldady. Bul tyıym alty aıdan keıin kúshine enbek.
Italııada 1975 jyldan beri adamdarǵa qoǵamdyq oryndarda betterin páranjamen nemese mototsıkl shlemimen búrkemeleýge tyıym salatyn zań bar. Al sáýirdiń 29-ynda Italııadan úlgi alǵan Belgııanyń Ókilder palatasy adamnyń betin kórýge múmkindik bermeıtin kez-kelgen kıimge tyıym salý týraly zań jobasyn maquldady.
