Endi mektepter óz oqýshylaryn býllınge qarsy turýǵa baýlıdy

Mektepter óz oqýshylaryn býllıngke qarsy turýǵa baýlı bilýge tıis. Balalardyń quqyqtaryn qorǵaýdyń keshendi josparynda bilim oshaqtaryna osyndaı talap qoıylyp otyr. Ortalyq kommýnıkatsııalar qyzmetinde ótken dóńgelek ústelde Oqý-aǵartý vıtse-mınıstri Edil Ospan osyndaı málimet keltirdi, dep habarlaıdy QazAqparat tilshisi.

«Keshendi jospardyń negizgi sharalarynyń biri − mektepterde jeke qaýipsizdik sabaǵyn engizý. Jeke qaýipsizdik sabaǵynda balalar ártúrli jaǵdaılardy sheshýge kómektesetin bilim men daǵdylardy úırenedi. Balalarǵa qaýipti jaǵdaılardyń aldyn alý daǵdysyn úıretý jáne oǵan qalaı áreket etý kerektigin bilý olardyń ómirinde kezdesetin qıyndyqtarǵa senimdi, emotsıonaldy turaqty jáne daıyn bolýyna múmkindik beredi», - dedi Edil Ospan.

Keshendi jospar asynda balalardy psıhologııalyq-pedagogıkalyq súıemeldeý sapasyn arttyrý kózdelgen.

«Elimizdiń ár óńirinde bilim berý protsesine qatysýshylardy psıhologııalyq-pedagogıkalyq qoldaý ortalyqtary (bilim alýshylar, pedagogtar, ata-analar) jumys isteıtin bolady. Olardyń qyzmeti bilim berý uıymdaryndaǵy psıhologııalyq qyzmetterdi úılestirýge jáne ádistemelik súıemeldeýge ǵana emes, sonymen qatar balalar men ata-analarǵa tegin konsýltatsııalyq qyzmet kórsetýge baǵyttalǵan», - dedi vıtse-mınıstr.

Jospar aıasynda elmizde mektepishilik esepke alýdyń keıs-menedjment tehnologııasy engizilip jatyr.

«Atalǵan tetik qıyn jaǵdaı týyndaǵan sátten bastap ony tolyq sheshkenge deıin balalarǵa jan-jaqty qoldaý kórsetýge múmkindik bermek. Ýaqtyly kómek pen qoldaý kórsetý jaýapkershiligi bilim berý uıymdarynyń basshylaryna júktelgen», - dedi vedomstvo ókili.