Endi MÁMS aýdarymdaryn jeke emhanalarda emdelý úshin de paıdalaný múmkindigi usynylmaq
Tıisti bastama Ashyq NQA portalynda jarııalanǵan «QR keıbir zańnamalyq aktilerine básekelestik máseleleri boıynsha ózgerister men tolyqtyrýlar engizý týraly» QR Zańynyń jobasyna retteýshi saıasattyń konsýltatıvtik qujatynda kóterilgen, dep habarlaıdy QazAqparat tilshisi.
«Búgingi tańda Mindetti áleýmettik medıtsınalyq saqtandyrý (MÁMS) júıesi arqyly kórsetiletin medıtsınalyq qyzmetterge tarıfter az qarjylandyrylady. Bul osy qyzmetterdiń sapasynan baıqalady. Osylaısha, halyq neǵurlym jedel jáne sapaly bal alý maqsatynda jeke medıtsınalyq uıymdarǵa júginedi. Alaıda, olardyń quny memlekettik emhanalarmen salystyrǵanda 2-3 ese qymbat. Osyǵan qaramastan, halyq jeke emhanalarǵa belsendi túrde júginedi, bul rette azamat aı saıyn Áleýmettik medıtsınalyq saqtandyrý qoryna (ÁMSQ) aýdarylatyn qarajatyn paıdalana almaıdy. Osyǵan baılanysty, halyqqa óziniń áleýmettik aýdarymdaryn paıdalanýǵa múmkindik berý maqsatynda jeke emhanalardaǵy medıtsınalyq qyzmetterge birlesip tóleý tetigin engizý qajet. Osylaısha, halyqqa medıtsınalyq qyzmetter úshin aıyrmashylyqty qosymsha tóleýge múmkindik beriledi», - delingen qujatta.
Básekelestikti qorǵaý jáne damytý agenttiginiń málimetinshe, mundaı júıeni engizý azamattardyń sapaly qyzmet alýyna jáne jeke medıtsınalyq emhanalardyń damýy men keńeıýine yqpal etpek.
