Endi Qytaıdan kelgenderdiń bári 14 kún karantınde bolady - Bekshın

TALDYQORǴAN. QazAqparat - Búgin QR Bas sanıtar dárigeri Jandarbek Bekshın Almaty oblysynyń Panfılov aýdanyndaǵy úsh shekara beketinde ornalasqan medıtsınalyq pýnktilerdi tekserdi, dep habarlaıdy QazAqparat tilshisi Panfılov aýdany ákiminiń baspasóz qyzmetine silteme jasap.

Qazirgi ýaqytta «Qorǵas» shekara mańy halyqaralyq yntymaqtastyq ortalyǵy naýryzdyń birine deıin jabyq tur. Al jolaýshylar tasymaly toqtaǵan «Nur joly» men «Altynkól» beketterinde sanıtar-epıdemıolog mamandar kúsheıtilgen rejımge kóshken.

Qazir Jarkent qalasynda 100 adamǵa arnalǵan arnaıy sanıtarlyq oqshaýlaý orny daıyn. Sondaı-aq, qajet bola qalǵan jaǵdaıda qoldanylatyn qosymsha 160 oryn qarastyrylǵan. Barlyq sanıtar-epıdemıologtar tolyq medıtsınalyq jabdyqpen qamtamasyz etilgen.

«Aqpannyń 20-synan bastap Qytaıdan kelgen adamdardyń barlyǵy 14 kúnge deıin arnaıy sanıtarlyq orynda bolady. Óıtkeni bul vırýsty juqtyrǵan adamnan birden eshqandaı syrqat belgileri baıqalmaýy múmkin. Koronavırýstyń aǵzadaǵy jasyryn kezeńi 14 kúnnen 24 kúnge deıin sozylý faktisi anyqtalǵan. Qytaıdan ótken azamattar 14 kún jatyp shyqqannan keıin de on kún tolyq baqylaýda bolady. Sol sebepti saqtyq sharalary júrgizilip jatyr», -dedi Jandarbek Bekshın.