Endi qazaqstandyqtar Arab Ámirlikterinde 90 kúnge deıin vızasyz júre alady

ASTANA. QazAqparat – Birikken Arab Ámirlikteri týrısterge, jumys izdeýshilerge jáne elge qonys aýdarǵysy keletinder úshin jańa vızalyq erejeler engizý arqyly kóshi-qon zańnamasyn jańartty, dep habarlaıdy QazAqparat WAM-ge silteme jasap.

Immıgratsııalyq zańnamany qaıta qaraý nátıjeleri boıynsha BAÁ sáıkestendirý, azamattyq, kedendik jáne porttyq qaýipsizdik federaldy basqarmasy (ICP) týrısterge, jumys izdeýshilerge jáne Parsy shyǵanaǵy elinde turýǵa múddeli adamdarǵa qatysty vızalyq erejelerdiń jańa paketin engizdi. Jańa erejeler 3 qazanda kúshine endi.

Olar BAÁ-ge barýǵa jáne turýǵa múmkindik beretin vızalardyń 15 túrine arnalǵan jańartylǵan talaptar men erejelerdi qamtıdy. Olardyń ishinde týrıstik kirý vızalary, altyn jáne jasyl turý yqtııarhattary, jer ústi porttary arqyly júk kóliginiń júrgizýshilerine kirýge ruqsattar, kórshi elderdiń azamattaryna, krýızdik keme qyzmetkerlerine arnalǵan vızalar jáne t. b. bar.

Gulf News-tiń habarlaýynsha, týrıster úshin uzaǵyraq vızalar, jasyl vıza boıynsha turý merzimin uzartý jáne keńeıtilgen 10 jyldyq altyn vıza shemasy jańadan engizilgen erejelerdiń basty jańalyǵy boldy. Endi týrıster Ámirlikterde burynǵydaı 30 emes, 60 kún bola alady.

Sonymen qatar bes jyldyq birneshe rettik týrıstik vıza kelýshilerge BAÁ-de qatarynan 90 kúnge deıin turýǵa múmkindik beredi. Al jumys izdeýshilerge arnalǵan vıza kásibı jumysshylarǵa demeýshisiz nemese qabyldaýshy tarapsyz BAÁ-de jumysqa ornalasý múmkindikterin izdeýge kómektesedi.

Foto: zavarnik.biz