Endi «Qazaqstan arýyn» halyq tańdaıdy (FOTO)
ALMATY. QazAqparat - Bıyl «Mıss Qazaqstan-2014» sulýlyq baıqaýynyń formaty ózgerdi. Endi eldegi eń sulý arýdy halyq tańdaıtyn boldy. Bul týraly búgin Almatyda ótken baspasóz máslıhaty barysynda baıqaýdyń dırektory Alena Rıvlına-Kyrbasova málimdedi.
«Bıyldan bastap, elimizdiń eń sulý qyzyn halyq tańdaıdy. Ádil qazylar alqasy 3 fınalıst qyzdy irikteıtin bolady. 2014 jyldyń 28 qarashasynda baıqaýdyń fınaly ótedi. Munda biz tikeleı efırden onlaın jáne SMS daýys berý jelisin ashamyz. Al daýys berý úderisin saıt arqyly kez-kelgen adam baqylaı alady. Osylaısha, konkýrs ashyq ári jarııa ótedi», - dedi Alena Rıvlına-Kyrbasova.
Onyń aıtýynsha, mundaı format «ádil qazylar arasyndaǵy barmaq basty, kóz qysty» týraly qaýesetterdi joıýǵa kómektesedi. «Biz ne úshin muny uıymdastyryp otyrmyz? Jylda dodadan syrt qalǵan qyzdardyń jaqtaýshylary «bunyń bári satylyp alyndy, ádiletsiz» dep jatady. Endi, ol stereotıpti buzamyz. Kim top jaratynyn biz de, jıýrı músheleri de bilmeıtin bolady. Daýys berýdi tikeleı efır arqyly qorytyndylaıtyn bolamyz», - dedi dırektor. 2010 jylǵy Almatynyń eń sulý arýy atanǵan, «Mıss Qazaqstan-2010» baıqaýynda ekinshi oryndy ıelengen Saltanat Bekjigitova da jańa ózgeris baıqaýdy ádil etýine áser etedi dep sanaıdy. «Men baıqaýda top jarǵan kezde jıýrı múshelerine, uıymdastyrýshylarǵa kók tıyn bergen joqpyn. Biraq, jeńimpaz atanǵan kezimde meniń atyma «mynaý júldeni satyp alǵan», «ádil ótpedi» degen sııaqty sózder boldy. Osyndaı qańqý sózdiń esh negizsiz ekendigin dáleldeý kerek», - dedi Saltanat.
Bıylǵy baıqaýǵa belgili ánshi Lýına, telejúrgizýshi Saltanat Bekjigitova, ánshi Álı Oqapov, Ilıa Ilın, Marat Oralǵazın qazylyq etetin bolady. Baıqaýǵa qatysam degen qyzdar onlaın tirkelýden ótýi tıis. Keıin tirkelgen aımaq boıynsha kastıngten ótedi. 2014 jyldyń 1-30 qazan aralyǵynda baıqaý komıteti ár aımaqqa baryp, 100 sulý qyzdy iriktep alady. Odan keıin 4-15 qazan aralyǵynda Qazaqstannyń kez-kelgen azamaty misskazakhstan.kz saıty arqyly eń úzdik 5 fınalısti anyqtaıdy.
