Endi qaıyq kóshedegi sýǵa júzbeıdi – elorda ákimdigi Momyshuly dańǵylyn sý almaıtynyna sendirdi

NUR-SULTAN. QazAqparat – Nur-Sultan qalasynyń ákimdigi jylda jazdaǵy nóserbe sý alyp ketetin B.Momyshuly dańǵylyndaǵy problemanyń sheshimin tapqanyn jarııa etti, dep habarlaıdy QazAqparat tilshisi.

«Baýyrjan Momyshuly dańǵylyndaǵy jaýynǵa arnalǵan nóser sýy júıesiniń magıstraldyq kollektory qurylysyn júrgizý barysynda buryn salynǵan qubyrlar alynyp tastaldy. Qubyrlardy ashqan kezde olardyń batpaqpen tolyq bitelip qalǵany anyqtaldy. Osylaısha aldaǵy ýaqytta kósheni sý alyp ketpeý úshin kólemi kishi qudyqtar aýqymdy kameraǵa aýystyrylady. Bul óz kezeginde teleınspektsııany kedergisiz júrgizip, kollektordy tazartyp otyrýǵa múmkindik beredi», - dep habarlaıdy qala ákimdigi Instagram paraqshasynda .

Sonymen qatar aldaǵy ýaqytta B.Momyshuly dańǵyly boıynsha bordıýr bóliginiń janyndaǵy qubyrlardyń dıametri keńeıtiledi. Jaýyn-shashyn sýyn qabyldaıtyn naýa ornatylady. Qala ákimdigi osy sharalardyń bári de aǵyn sýdy qabyldaýǵa qaýqarly ekendigine sendiredi.

«Jaýyn-shashyn káriziniń magıstraldyq kollektorynyń qurylysy osy jyldyń jazynda aıaqtalady. Qaıyqpen júretinde jaıylma sý kóshege kólkip shyqpaıdy. Atalmysh jaýyn-shashyn káriziniń uzyndyǵy 500 metr – Daýylpaz kóshesinen bastalyp, Elim-aı kóshesine deıin jalǵasady», - delingen habarlamada.

Dańǵyl boıynda avtokólikterdiń qozǵalysyna qazir ishinara shekteý qoıylǵan. 15 mamyrda jóndeý jumystaryna baılanysty atalmysh kóshedegi qozǵalysqa 10 kúnge shekteldi.

«Sonymen qatar elordada «Jastar» (Molodejnyı) shaǵyn aýdanyndaǵy tazartý qurylymynyń qurylysy júrgizilýde. Ondaǵy jańa qurylymnyń qýaty táýligine 42 myń tekshe metr. Ol kárizdiń ótkizý qabiletin edáýir arttyrady. Atalmysh tazartý qurylymdary J.Táshenov, Baraev, Sh.Ýálıhanov, Imanbaeva kósheleri men Respýblıka dańǵylyn sý alýdan saqtaıdy. Aıta keterligi 2019 jyly Myńjyldyq alleıasyndaǵy eki birdeı jaýyn-shashyn káriziniń ýchaskesindegi problema sheshilgen edi», - dep habarlaıdy qala ákimdiginen.

Eske sala ketsek osydan eki jyl buryn elordada tolassyz jaýǵan nóserden qala kóshelerin sý basyp ketken bolatyn. Jaıylma sý basqan osy tusta eki jigit úrleme qaıyqpen júzgen. Bul áreketti Astana qalalyq ІІD usaq buzaqylyq dep baǵalap, Ákimshilik quqyq buzýshylyqtar týraly kodekstiń 434-babyna sáıkes hattama toltyrǵan jáne Astananyń arnaıy mamandandyrylǵan aýdanaralyq ákimshilik soty olardyń árqaısysyna 5 AEK (12 myń 025 teńge) aıyppul salǵan edi.

Alaıda kóp ótpeı qalalyq sot qaıyqpen júzgen turǵyndarǵa salynǵan aıyppuldy alyp tastady.