Endi HQKO arqyly berilgen ótinim jaǵdaıyn telefon arqyly bilýge bolady
ASTANA. QazAqparat - Memlekettik qyzmetter boıynsha biryńǵaı baılanys ortalyǵy jańa servıs túrin kórsetýde: endi HQKO arqyly berilgen ótinim jaǵdaıyn kez kelgen ýaqytta telefon arqyly anyqtaýǵa bolady.
Bul týraly «Ulttyq aqparattyq tehnologııalar» AO baspasóz qyzmetinen habarlady. Bul úshin 1414 nomirine habarlasyp qyzmet kórsetý tilin tańdap odan keıin «4» sanyn terip HQKO berilgen qolhattaǵy 12-tańbaly kodty engizip # basý kerek. Budan keıin habarlasqan adamǵa ótinim jaǵdaıy: qabyldanǵany, óńdelýde ekendigi, oryndalý úshin memlekettik organǵa jiberilgeni, jumysqa alynǵany, oryndalǵany nemese qujattyń daıyn bolǵany týraly habarlanady. Sońǵy statýs «qujattar berilgen» dep esepteledi. «Ulttyq aqparattyq tehnologııalar» AQ klıenttik qyzmet kórsetý jónindegi atqarýshy dırektor Ásel Moldabekovanyń aıtýynsha, jańa servıs túrin qoldaný kezinde operatordyń jaýabyn kútýdiń qajeti joq, óıtkeni qyzmet kórsetý avtomatty túrde júrgiziledi. «Bul óte yńǵaıly, sebebi halyqqa qyzmet kórsetý ortalyǵy nemese memlekettik organǵa habarlasýdyń qajeti joq. Sondaı-aq, 1414 biryńǵaı baılanys ortalyǵyna habarlasý Qazaqstan boıynsha barlyq operatorlardyń abonentterine absolıýtti tegin», - dep tolyqtyrdy Moldabekova. Qazirgi tańda ortalyq operatorlary halyqqa 561 memlekettik qyzmet boıynsha: onyń ishinde salyq komıtetiniń 32 qyzmeti men ZTMO 30 qyzmeti boıynsha qyzmet kórsetedi. 2013 jyly BBO mamandary 2,5 mln.ótinim qabyldasa, 2014jyldyń alǵashqy 5 aıy boıynsha 1,5 mln.astam ótinimdi qabyldady.
