Endi geologııalyq aqparattyń quny 1 kúnniń ishinde aıqyndalatyn bolady
ASTANA. QazAqparat - Geologııalyq aqparattyń quny endi 1 kúnniń ishinde aıqyndalatyn bolady. Bul týraly búgin Indýstrııa jáne jańa tehnologııalar mınıstrliginde ótken baspasóz máslıhatynda Geologııa jáne jer qoınaýyn paıdalaný komıtetiniń tóraǵasy Bazarbaı Nurabaev osylaı málim etti.
Komıtet tóraǵasynyń aıtýynsha, geologııalyq barlaý boıynsha negizgi jumystardyń biri ótken jyldardaǵy materıaldardy zerdeleý bolyp tabylady. «Bul rette shyǵyndardy esepteýdiń bonıtetti júıesin engizý josparlanady. Osynyń arqasynda geologııalyq aqparattyń qunyn aıqyndaý merzimi 240 kúnnen 1 kúnge deıin qysqartý múmkin bolady. Soǵan baılanysty arnaıy Úkimet qaýlysyna qol qoıylǵan», - dedi B. Nurabaev. Osyǵan oraı, komıtet tóraǵasy aqparattyq baǵyttyń basymdyǵyn atap ótti. Onyń aıtýynsha, kez-kelgen ınvestor nemese geologııalyq barlaý jumysyna qyzyǵýshy tarap eń aldymen ótken jyldardaǵy aqparattarmen tanysýǵa múddeli. «Problemalyq máseleniń biri osy bolatyn. Sony byltyrdan beri qolǵa alyp, arnaıy jumystar atqardyq, mınıstrdiń júktegen mindetteri tolyq júzege asty. Geologııalaq aqparattar alý úderisi ońaılandyrylyp keledi»,- deıdi komıtet basshysy. Onyń sózine qaraǵanda, búgingi kúni bos terrıtorııalar boıynsha geologııalyq esepteýler 1 aılyq eseptik kórsetkishke teń somaǵa usynylady. Sonymen qatar, bonıtettik júıe negizinde shyǵyndardy esepteýge qatysty jer qoınaýyn paıdalanýshylardyń 105 nysany boıynsha konkýrstar ótkizý josparlanǵan. Munda da konkýrstyq úderister jeńildetiledi.
