Endi gazdy nemese elektrli qarý ustaýǵa 18 jastan asqan soń ǵana ruqsat beriledi
PETROPAVL. QazAqparat – Soltústik Qazaqstan oblysynyń polıtsııa departamenti qyzmetkerleri qarýǵa ruqsat resimdegisi keletin adamdarǵa 11 qyrkúıekten bastap zańnamaǵa ózgerister engizilgenin málim etti, dep habarlaıdy QazAqparat tilshisi.
SQO PD baspasóz qyzmetiniń málimetinshe, zańnamada jas shamasy ózgertilgen. Endi ózin-ózi qorǵaý úshin tek 18 jastan bastap qana gazdy ne elektrli qarýdy ıelenýge quqyq berilgen. Tegis uńǵyly ańshy qarýyna 21 jastan bastap ruqsat berilse, oıyq qarýdy 3 jyl ańshylyq tájirıbesi barlar jáne 24 jastan asqan azamat qana ala alady.
Medıtsınalyq talaptar da qatańdatyldy. Zorlyq-zombylyqqa jáne qumar oıyndarǵa beıimdiliktiń bolýyn anyqtaý úshin qazir 5 jylda bir ret psıhologııalyq testileýden ótýdi engizý qarastyrylyp jatyr.
«Medıtsınalyq qarsy kórsetilimderi bar, sondaı-aq birneshe quqyq buzýshylyq jasaǵandarǵa qarý ıelený ruqsatyn toqtatý múmkindigi engizilmek. Zańsyz qarý jáne zańsyz esirtki aınalymymen baılanysty aýyr jáne asa aýyr qylmystar, sondaı-aq terrorıstik, ekstremıstik qylmystar jasaǵany úshin jaýapqa tartylǵan adamdarǵa, sonyń ishinde jazasyn ótep shyqqandarǵa da qarý ustaýǵa ómir boıyna tyıym salynǵan. Zańdy tulǵalarǵa qarýdy atýǵa jaramsyz jaǵdaıda saqtaý mindettemesi engiziledi», - deıdi tártip saqshylary.
Qylmystyq jáne ákimshilik zańnamaǵa jańa túsinikter engiziledi: oqsyz atylatyn qarýdyń negizgi (quramdas) bólikteri azamattyq qarýǵa jatqyzylady. Laqtyrylatyn, oqsyz atylatyn, belgi beretin qarýlardy jáne olardyń negizgi (quramdas) bólikterin zańsyz paıdalanǵany, sondaı-aq eldi mekenderde qarýdy, onyń ishinde oqsyz atylatyn qarýdy zańsyz qoldanǵany úshin qylmystyq jáne ákimshilik jaýapkershilik kózdelgen.
Zańnamaǵa engizilgen ózgerister týraly adilet.zan.kz QR normatıvtik quqyqtyq aktileriniń aqparattyq-quqyqtyq júıesinen, SQO PD Ákimshilik polıtsııa basqarmasynyń Facebook jáne Instagram áleýmettik jelilerindegi akkaýnttarynan, sondaı-aq basqarmanyń 8 (7152) 49-37-43 nemese Petropavl qalasy PB ákimshilik polıtsııa bóliminiń 8 (7152) 49-32-34 telefony arqyly tolyq bilýge bolady.
Foto: sfchronicle.com
