Endi em qabyldaýshylar medıtsınalyq kómek sapasyn táýelsiz sarapshylardyń taldaýy arqyly baǵalaı alady
ASTANA. 9 aqpan. QazAqparat /Rýslan Ǵabbasov/ - Jyl sońyna deıin densaýlyq saqtaý sýbektilerin tirkeý boıynsha táýelsiz organ qurylatyn bolady.
Bul jaıynda búgin Astanada ótken baspasóz máslıhatynda atalǵan mınıstrliktiń Medıtsınalyq jáne farmatsevtıkalyq qyzmetti baqylaý komıtetiniń tóraǵasy Baýyrjan Baıserkın málim etti.
Táýelsiz saraptama ınstıtýty engizilgennen keıin em qabyldaýshylardyń quqyǵyn qorǵaý júıesi qurylatynyna toqtalǵan ol: «Búginde emdelýshiler táýelsiz saraptama júıesi bar ekenin bilýi tıis. Onda em qabyldaýshylar medıtsınalyq kómek kórsetilýi jaıynda jáne onyń tıisti talaptarǵa saı kelýi turǵysynda medıtsınalyq qyzmetkerlerden táýelsiz saraptamany bile alady», - dedi.
Osy oraıda halyqqa qoljetimdi bolýy úshin em qabyldaýshylardyń quqyǵy júıesi aıasynda táýelsiz sarapshylar ınstıtýty qurylmaq. Komıtet tóraǵasynyń sózine qaraǵanda, endi barlyq shaǵymdardy mınıstrlikke joldamaı-aq, bul jumystardy emdelýshi ózi de atqaryp, qajetti qujattardy sarapshydan alýǵa qaýqarly. «Bul sarapshylar tirkeýden ótken qyzmetkerler jáne olar emdelýshiniń quqyǵyn qorǵaý maqsatynda sot isterine de qatysa alady. Osyndaı júıe búginde kóptegen damyǵan elderde iske qosylǵan», - dedi B. Baıserkın.
Onyń aıtýynsha, azamattardan Densaýlyq saqtaý mınıstrligine kelip túsken shaǵymdar bul júıe aıasynda memlekettik tapsyrys boıynsha táýelsiz sarapshylar qaýymdastyǵynda ornalastyrylady. Olar óz kezeginde bólingen qarjymen táýelsiz sarapshylardyń atqarǵan qyzmetin tóleıtin bolady. Osy sharalardy atqarýǵa negizdelgen memlekettik tapsyrysqa jyl saıyn 30 mıllıon teńge bólinbek.
