Endi eGov neke qıylǵan kúnniń mereıli datasyn eske salady

ASTANA. QazAqparat – «Sizdi nekeńizdiń aldaǵy mereıtoıymen quttyqtaımyz!» Mundaı quttyqtaý habarlamasy eGov Mobile qosymshasyndaǵy push habarlamalary arqyly jiberiledi. Bul týraly QazAqparat «Ulttyq aqparattyq tehnologııalar» AQ qoǵammen baılanys basqarmasyna silteme jasap habarlaıdy.

«Búgingi tańda «Invisible Government» tujyrymdamasy aıasynda memleket azamatqa ártúrli ómirlik jaǵdaılarda ózdiginen kómektesedi, qyzmetti óz betinshe usynady, onyń qajettilikterin jabady. Qazaqstandyqtarǵa olardyń ómiriniń mańyzdy kúnderin eske túsirý úshin eGov Mobile qosymshasynda push habarlamalaryn iske qostyq. Sondaı-aq, olardyń kómegimen qujat merziminiń aıaqtalǵanyn aldyn ala eske salamyz. Sonymen qatar, azamattar belgili bir memlekettik qyzmetterdi nemese proaktıvti qyzmetter týraly habarlamalardy alý boıynsha usynystar alady», - deıdi «Ulttyq aqparattyq tehnologııalar» AQ basqarma tóraǵasy Rostıslav Konıashkın.

eGov Mobile qosymshasyndaǵy push habarlamalar qazaqstandyqtarǵa neke qıylǵan kúnniń mereıli datasynan 3 kún buryn jiberiledi.

Sondaı-aq, paıdalanýshynyń jeke kýáliginiń jaramdylyq merzimi aıaqtalǵany týraly da eske salady (merziminen 30, 15 jáne 5 kún buryn) jáne týǵan kúnmen quttyqtaıdy.

Habarlamalarda mátinnen basqa, azamattar tıisti qyzmetti nemese servısti ashyp, qujatqa qol qoıa alatyn túımeler bar.