Endi bilim grantyn bólýde talapkerdiń UBT nátıjesi, áleýmettik mártebesi men jetistigi eskeriledi

ASTANA. QazAqparat – Talapkerlerge oqý granttary saralanǵan júıe boıynsha berilýi múmkin. «Ashyq» NQA portalynda jarııalanǵan Ǵylym jáne joǵary bilim mınıstriniń buıryǵynda osylaı jazylǵan, dep habarlaıdy QazAqparat tilshisi.

Mınıstrlik granttardy saralanǵan tártippen berý jobasyn ázirlegen. Oǵan sáıkes, jalpy bilim berý tapsyrysyndaǵy granttar «Bazalyq», «Daryn» jáne «Qamqor» bolyp bólinedi.

Saralanǵan grant túrleri mynadaı araqatynasta beriledi:

- bazalyq granttardyń jalpy sany – memlekettik bilim berý tapsyrysy kóleminiń keminde 50%;

- «Daryn» granttarynyń jalpy sany – memlekettik bilim berý tapsyrysy kóleminiń 10% aspaıdy;

- «Qamqor» granttarynyń jalpy sany – memlekettik bilim berý tapsyrysy kóleminiń keminde 30% quraıdy.

Bul rette mınıstrlik engizilgeli otyrǵan saralanǵan bilim berý grantyna qatysty túsinikteme bergen.

Qujat 21 sáýirge deıin kópshilik talqylaýda bolady.