Endi baspana qurylysynda ıgerilmegen qarjyny mınıstrlik birjaqty tártipte qaıtaryp alatyn bolady

ASTANA. 14 qańtar. QazAqparat - Óńirler jalǵa beriletin baspana men ınjenerlik jeliler qurylysyna bólingen qarjyny ıgermegen jaǵdaıda, kelisimge «qarjyny ıgermegen jaǵdaıda birjaqty tártipte tárkileý» týraly tarmaqty engizý josparlanýda. Bul týraly búgin «Qoljetimdi baspana-2020» baǵdarlamasyn júzege asyrý máselesine arnalǵan Úkimet otyrysynda Óńirlik damý mınıstri Bolat Jámishev málim etti.

Óz kezeginde Úkimet basshysy Serik Ahmetov aldyn ala bundaı quqyq vedomstvoǵa beriletinin jáne osyndaı sheshim qabyldanatynyn qadap aıtty.

Turǵynúıqurylysjınaq júıesi arqyly iske asyrylatyn baspana qurylysyna 2013 jyly respýblıkalyq bıýdjetten jergilikti atqarý organdaryna 29,4 mlrd. teńge nesıelik qarjy bólindi. Onyń 27,9 mlrd. teńgesi nemese 95 paıyzy ıgerildi (ıgerý merzimi 2 jyl).

«Mańǵystaý oblysynan basqa nesıelik baspanany tapsyrý boıynsha jyldyq jospardy barlyq ákimdikter oryndady. 320 myń sharshy metr nesıelik turǵyn úı salyndy nemese jyldyq josparǵa 122,8 paıyzdy qamtydy. Alaıda, ótken jyldardaǵy bekitilgen kesteden qalys qalǵan qurylys qarqynyn tolyǵymen qamtý múmkin bolmady. Osyny eskere otyryp jospardy oryndaý 74 paıyzdy qurady», - dedi mınıstr. Budan bólek B. Jámishev turǵyn úı qurylysy aýdandaryndaǵy ınjenerlik-kommýnıkatsııalyq ınfraqurylym qurylysy máselesine toqtaldy. 2013 jyly bul baǵytqa respýblıkalyq bıýdjetten 40,1 mlrd. teńge maqsatty transfertter bólinip, onyń ishinde 39,7 mlrd. teńgesi nemese 99 paıyzy ıgerilgen eken. Mınıstr óńirler jalǵa beriletin baspana men ınjenerlik jeliler qurylysyna bólingen qarjyny ıgermegen jaǵdaıda, kelisimge «qarjyny ıgeremegen jaǵdaıda birjaqty tártipte tárkileý» týraly tarmaqty engizý josparlanyp otyrǵandyǵyn sóz etti.