Endi bala týýyna beriletin járdemaqyny bir ǵana ótinishpen rásimdeýge bolady
Bala ómirge kelgen sátten bastap ata-anasynyń biri birjolǵy járdemaqy alýǵa jáne bir jasqa tolǵanǵa deıingi bala kútimine baılanysty áleýmettik tólemderge qaqysy bar. Endi bul járdemaqylardy «Azamattarǵa arnalǵan» memlekettik korporatsııasynyń front-ofısterinde elektrondyq úkimet portaly arqyly bir ǵana ótinish berip resimdeýge bolady.
«Azamattarǵa arnalǵan» memlekettik korporatsııasynyń fılıaly - ZTMO dırektorynyń orynbasary Serikhan Sabyrjanovtyń aıtýynsha, ata-ananyń elektrondyq tsıfrlyq qoltańbasy bolǵan jaǵdaıda, «Connection point» óz ózine qyzmet kórsetý sektorlarynda nemese úıde otyryp-aq atalǵan járdemaqylarǵa ótinish berýge bolady. Elektrondyq úkimet portaly arqyly berilgen ótinish járdemaqy taǵaıyndaý týraly sheshim qabyldaıtyn Zeınetaqy tóleý jónindegi ortalyqqa avtomatty túrde jiberiledi. Buryn bul qyzmetti alý úshin azamattar atalmysh járdemaqylardy taǵaıyndaýǵa qatysatyn barlyq memlekettik organdarǵa ózi barýy qajet bolatyn.
Aıtpaqshy, bir jasqa deıingi bala kútimine baılanysty áleýmettik tólemderdi óz betinshe formýla arqyly esepteýge de bolady. Aı saıynǵy tólem kólemi sońǵy 24 aıdaǵy ortasha aılyq kiristi 0,4 - kiristi almastyrý koeffıtsıentine kóbeıtý arqyly anyqtalady. Mysaly, sońǵy eki jyldaǵy ortasha aılyq tabysyńyz 60 myń teńgeni qurasa, onda aı saıynǵy tólem kólemi 24 myń teńgeni quraıdy. Al jumyssyz analarǵa tólenetin aı saıynǵy áleýmettik tólem mólsheri birinshi bala úshin 5,76 AEK, ekinshi bala úshin 6,81 AEK, úshinshi bala úshin 7,85 AEK jáne tórtinshi bala úshin 8,90 AEK-ti quraıdy. 2016 jyly birjolǵy járdemaqy kólemi birinshi, ekinshi jáne úshinshi balalar úshin 31,41 AEK jáne tórtinshi bala úshin 52,35 AEK-ti quraıdy.
Jyl basynan beri memlekettik korporatsııa arqyly 116 myń bala týýyna beriletin járdemaqy jáne bala kútimine baılanysty áleýmettik tólemaqy taǵaıyndalǵan, onyń ishindegi 656 járdemaqy men áleýmettik tólemder elektrondyq portal arqyly taǵaıyndalǵan.
