Endi azamattar sanatorııde emdelý úshin qajet medıtsınalyq qorytyndyny EGov portalynan ala alady
ASTANA. QazAqparat – Endi qazaqstandyqtar EGov.kz portaly men eGov Mobile mobıldik qosymshasy arqyly sanatorıı-kýrorttyq emdeý qajettiligi týraly qorytyndyny jáne aldyn ala mindetti medıtsınalyq tekserýden ótý úshin anyqtama alýǵa ótinim bere alady, dep habarlaıdy QazAqparat tilshisi.
«Azamattar «Sanatorıı-kýrorttyq emdeý qajettiligi týraly qorytyndy berý» qyzmetiniń arqasynda sanatorıı-kýrorttyq emdelýge qorytyndy alý úshin elektrondyq ótinim bere alady. Ótinish bergen kezde jiberilgen dıagnozǵa sáıkes klınıkalyq-dıagnostıkalyq zertteýler nátıjeleriniń elektrondyq kóshimesi bolýy qajet», - delingen portaldyń resmı saıtynda jarııalanǵan habarlamada.
Al, aldyn ala mindetti medıtsınalyq tekserýden ótý qyzmetin myna sanattaǵy azamattar ala alady:
- dárihanalardyń, farmatsevtıkalyq uıymdardyń qyzmetkerleri;
- qyzmet kórsetý salasynyń qyzmetkerleri (monsha, saýna, shashtaraz, sulýlyq salondary, kir jýatyn oryndar, hımııalyq tazalaýshylar), basseınder men gıdropatııalar, balshyq vannalar, sporttyq-saýyqtyrý uıymdarynyń jumysshylary;
- qan qyzmeti uıymdarynyń medıtsına mamandary, hırýrgııalyq, gınekologııalyq, akýsherlik, gematologııalyq, stomatologııalyq profılder men medıtsına qyzmetkerleri;
- mektepke deıingi uıymdardyń, mektep-ınternattardyń, balalar sanatorııalyq-kýrorttyq jyl boıǵy saýyqtyrý uıymdarynyń, balalar úıleriniń qyzmetkerleri, otbasy úlgisindegi úılerdiń qyzmetkerleri;
- jolaýshylarǵa qyzmet kórsetý uıymdarynyń qyzmetkerleri (temir jol vokzaldary, aerovokzaldar, áýejaılar, teńiz jáne ózen stantsııalary, avtovokzaldar, metropolıtender);
- qoǵamdyq tamaqtandyrý obektileriniń qyzmetkerleri;
- jalpy bilim beretin mektep, orta arnaýly jáne joǵary oqý oryndaryna oqýǵa túsýge úmitkerler, stýdentter.
«Bul qyzmetti alatyn azamattarǵa №075-ý nysanynda berilgen medıtsınalyq anyqtama (dárigerdiń konsýltatıvtik qorytyndysy) ne memlekettik qyzmetti kórsetýden bas tartý týraly dáledi jaýap nysanynda elektrondyq qujat «Jeke kabınetke» joldanady». Ótinimdi óńdeý týraly habarlama eGov.kz portalynyń «Jeke kabınetinde» 30 mınýt ishinde shyǵady», - dep jazylǵan EGov.kz portylynyń habarlamasynda.
