Endi aýyl turǵyndary memlekettik qyzmet alý úshin aýdan-qalaǵa sandalmaıdy

NUR-SULTAN. QazAqparat – Búginde aýyl turǵyndary memlekettik qyzmet alý úshin aýdan nemese jaqyn mańdaǵy qalaǵa barýǵa tıis. Endigi ýaqytta aýyldan shyqpaı-aq memlekettik qyzmetti alý múmkindigi týady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi tsıfrlyq transformatsııalaý departamentiniń dırektory Nazgúl Bajaeva málim etti, dep habarlaıdy QazAqparat tilshisi.

«Memlekettik qyzmetterdiń qoljetimdiligin arttyrý jáne memlekettik organdarmen ózara is-qımyl jasaý maqsatynda «Qazposhta» ulttyq operatorynyń bazasynda tsıfrlyq burysh paıda bolady. Tsıfrlyq burysh qyzmetin poshta jumysshysy usynady. Ol jer ınternet, kompıýter jáne basqa da qajetti tehnıkamen jabdyqtalǵan. Búginde aýyl turǵyndary memlekettik qyzmetti alý úshin «Azamattarǵa arnalǵan úkimet» memlekettik korporatsııasynyń bólimshesi bar aýdan ortalyǵyna nemese qalaǵa barady. Ol ýaqyt pen aqshany talap etedi», - dedi Nazgúl Bajaeva «AMANAT» partııasy alańynda ótken baspasóz máslıhatynda.

Onyń aıtýynsha, tsıfrlyq buryshtar Qazposhtanyń aýyldaǵy 2 myń bólimshesinde ashylady.

Sondaı-aq, atalǵan jańashyldyq búginde ShQO-da pılottyq rejımde iske asyp jatyr.

Odan bólek, mınıstrlik ókili 2025 jyldyń sońyna deıin elimizde keminde 20 myń ІT mamanyn daıarlaý jospary turǵanyn tilge tıek etti.

Buǵan deıin qazaqstandyqtar endi barlyq jerde jeke kýáliktiń elektrondy nusqasyn qoldana alatynyn habarlaǵan edik.

Sondaı-aq, qazaqstandyqtarǵa úıdegi ınternet operatoryn tańdaý múmkindigi berilmek.

Odan bólek, EgovMobile arqyly alýǵa bolatyn qujattar sany kóbeıgeni aıtyldy.