Endi aýyl sharýashylyǵy taýarlaryn óńdeý kásiporyndaryn salǵandar qarajatynyń belgili bir bóligin birden qaıtaryp ala alady - QR Aýyl sharýashylyǵy mınıstri
ALMATY. 20 sáýir. QazAqparat - «Agrobıznes-2020» baǵdarlamasy boıynsha kásipkerlerdi yntalandyrý maqsatynda endi ınvestıtsııalyq sýbsıdııalaý engizilip, bızneske salynǵan qarjynyń belgili bir bóligi memleket esebinen birden qaıtarylatyn bolady.
Bul týraly QR Aýyl sharýashylyǵy mınıstri Asyljan Mamytbekov búgin Almatyda qala mańyndaǵy azyq-túlik beldeýin damytý máseleleri boıynsha ótkizilgen jıynda aıtty.
«Búgingi kún tártibinde turǵan másele óte mańyzdy. Óıtkeni azyq-túlikpen qamtamasyz etý jyldan-jylǵa zor kúrdelenip keledi. Sondyqtan ony qadaǵalaýda ustaý kerek. Memleket basshysy men úkimet basshysynyń tıisti tapsyrmalary da bar. «QazAgro» holdıngi belsendi túrde kásiporyndardan qarjylandyrý týraly ótinishterdi qaraýda. Biz kásipkerlerdi qarjylyq turǵydan ǵana emes, veterınarlyq qamtamasyz etý sııaqty memlekettik organdar tarapynan qajetti qoldaý sharalaryn júzege asyrýǵa daıynbyz», - dedi A.Mamytbekov. Mınıstrdiń aıtýynsha, endi memleket kásipkerlerdiń agrarlyq sektordy ınvestıtsııalaýyn yntalandyrý sharalaryn qolǵa alýda. Máselen, et óńdeıtin zaýyt salsa, ınvestıtsııalyq sýbsıdııalaý arqyly bıznesmenderge salǵan qarajatynyń 20-30 paıyzyn birden qaıtaryp bermek. Óıtkeni, ózge salalarǵa qaraǵanda aýyl sharýashylyǵy birshama artta kele jatyr. Ondaǵy ónimdilik te tómen. Sondyqtan jaǵdaıdy osyndaı pármendi sharalarmen túzeý qajet.
