Endi Astanada azyq-túlik jármeńkesi kúnde ótedi
ASTANA. QazAqparat - Buryn senbi-jeksenbi kúnderi ǵana ótetin Astanadaǵy aýyl sharýashylyǵy ónimderiniń jármeńkesi endi kún saıyn ótedi. Bul týraly búgin Ortalyq kommýnıkatsııalar qyzmetiniń brıfıngisinde Astana qalasy ákiminiń orynbasary Andreı Lýkın málim etti.
«Áleýmettik mańyzdy azyq-túliktiń baǵasy qymbattaǵan soń, ákimdik birqatar sharalardy qolǵa alyp otyr. Birinshiden, qala ákimi tapsyrma berip, qalada ótetin apta saıynǵy aýyl sharýashylyǵy ónimderiniń jármeńkesi endi kún saıyn ótetin boldy», - dep habarlady ol.
Ákim orynbasary habarlaǵandaı, osyǵan deıin Astanada 39 jármeńke ótken, ol jármeńkelerde 336 tonna ónim naryqtaǵy baǵadan 10-15 paıyzǵa arzan satylǵan eken. «Ekinshiden, jármeńkeler ótetin oryndardy kóbeıttik. Endi Astananyń alty aýdanynda jármeńke ótkizý úshin oryndar belgilendi», - dep habarlady A.Lýkın.
Sondaı-aq, Astanaǵa óńirlerden taýar jetkizýshilerdiń kestesin belgilenip otyr. Qazir Qazaqstannyń segiz óńirinen Astanaǵa azyq-túlik taýarlary tikeleı keledi degen kelisimge qol jetken.
Esterińizge sala keteıik, elorda ákimi Áset Isekeshevtiń tapsyrmasy boıynsha, Astana ákimdiginiń janyna azyq-túilik baǵasyn turaqtandyrý úshin jedel shtab qurylǵan. Shtabty qala ákiminiń orynbasary Andreı Lýkın basqarady.
