Endi ár qazaqstandyq óz nesıelik tarıhyn nebári 15 mınýtta bile alady
ASTANA. 13 qyrkúıek. QazAqparat - Elektrondyq úkimet portaly «Derbes nesıe esebin alý» jańa qyzmetin iske qosýda. Egov.kz portalyn árbir qoldanýshy óziniń nesıelik tarıhyn 15 mınýt ishinde teksere alady. Qyzmet «Salyq jáne qarjy» taraýynyń, «Ekonomıka jáne qarjy» bóliminde ornalasqan.
Bul týraly «Ulttyq aqparattyq tehnologııalar» AQ baspasóz qyzmetinen habarlady.
Esepti alý úshin Qazaqstannyń belgili bir bankiniń tólem kartasy men elektrondyq-tsıfrlik qoltańbaǵa (ETsQ) ıe bolý kerek.
Qazaqstan Respýblıkasyndaǵy kredıttik bıýrolar jáne kredıttik tarıhty qalyptastyrý týraly zańynyń 21-babynyń 2-taraýy boıynsha kredıttik tarıh sýbektisi, ózi týraly kredıttik esepti kúntizbelik jyl ishinde bir ret tegin alýǵa quqyly.
Osy qyzmet boıynsha kúntizbelik bir jyl ishinde qaıtalap júgingen jaǵdaıda, tólem 500 teńge (kredıttik bıýro tarıfi 400 teńge jáne 100 teńge portaldyń tólemdik shlıýzi arqyly tólem jasalǵandyǵy úshin banktiń komıssııasy) bolady.
Jeke kredıttik eseptemede qaryz alýshy jaıly jáne onyń oǵan berilgen mindettemelerdi oryndaýy týraly, taýar nemese qyzmetterdi nesıege usynatyn, ekinshi deńgeıdegi bankterden, lızıngtik jáne taǵy basqa da kompanııalardan kelip túsetin, tolyq aqparattar da bolady.
Karyz alýshynyń bankterden jáne basqa da nesıelik uıymdardan oǵan túsken, kredıttik tarıhyndaǵy suranystar sanyń kórýge múmkindik beredi.
Kredıttik esep berý qyzmeti «Ulttyq aqparattyq tehnologııalar» AQ men «Alǵashqy nesıelik bıýrosy» JShS mamandarymen júzege asyrylǵan.
Tolyǵyraq aqparatty silteme arqyly, sonymen qatar, táýlik boıy jumys atqaratyn call-ortalyǵynan 1414 nómiri arqyly bilýge bolady.
Uıaly nemese qala telefondary arqyly qońyraý shalý Qazaqstan boıynsha tegin.
