Endi júrgizýshiler respýblıkalyq mańyzy bar joldardyń ahýalyn onlaın kóre alady

ASTANA. KAZINFORM — «QazAvtoJol» UK» AQ kólik júrgizýshileri úshin respýblıkalyq mańyzy bar aqyly joldardy onlaın rejımde kórsetetin aqparattyq servısti iske qosty.

Endi qoldanýshylar Kaztoll.kz saıty arqyly naqty ýaqyt rejıminde joldardyń jaǵdaıyn baqylaı alady. 

"Búgingi tańda 17 aqyly jolda 74 beınekamera ornatyldy, olar kólik qozǵalysynyń trafıgi, aýa raıy jáne joldyń jalpy jaǵdaıy týraly aqparatty beredi. Bul júrgizýshiler úshin aldyn ala sapardy josparlaýǵa, ońtaıly baǵyttardy anyqtaýǵa jáne joldaǵy qolaısyzdyqtardy aldyn alýǵa múmkindik jasaıdy. 

Bul jańa servıs sapar kezinde ýaqytty únemdeýge jáne qolaıly jaǵdaıdy qamtamasyz etý úshin taptyrmas qural bolmaq. Aqyly joldardyń onlaın kórsetiliminiń arqasynda júrgizýshiler keptelisterdi aldyn alyp, ýaqyttaryn únemdep, saparlaryn yńǵaıly ári qaýipsiz etip josparlaı alady", - dep jazdy vedomstvodan.

Joldardaǵy onlaın kórsetilim tek kólik júrgizýshilerge qolaıly jaǵdaıdy jasap qana qoımaı, sonymen qatar jol qaýipsizdigin arttyrýǵa baǵyttalmaq. Joldardyń jaǵdaıy týraly aqparat jol-kólik oqıǵalarynyń sanyn azaıtýǵa, barlyq jol qozǵalysyna qatysýshylar úshin saparlaryn qaýipsiz ári boljamdy etýge kómektesedi. 

Osylaısha, «QazAvtoJol» usynǵan aqyly joldardaǵy onlaın kórsetilim kólik júrgizýshileri úshin jańa múmkindikterdi ashyp, jol ınfraqurylymynyń sapasyn arttyrýǵa septigin tıgizedi.