Endi jumyssyzdyq boıynsha járdemaqyny birden ala almaısyz

2026 jyldyń 1 qazanynan bastap Eńbek jáne halyqty áleýmettik qorǵaý mınıstrligi jumys izdep júrgen azamattarǵa qyzmet kórsetý tásilderin jetildirý boıynsha kezeń-kezeńimen jumys júrgize bastaıdy. Osyǵan baılanysty elimizde pılottyq joba iske qosylady. Onyń aıasynda azamattarǵa qoldaý kórsetýdiń jańartylǵan tártibi synaqtan ótkizilip, mansap ortalyqtary men Memlekettik áleýmettik saqtandyrý qory fılıaldarynyń mamandary oqytylady.

Jańa tásildiń negizgi maqsaty azamattardy jumysqa ornalastyrýǵa kórsetiletin kómekti naqty adamǵa baǵyttap, onyń sapasyn arttyrý. Eń bastysy, kórsetiletin qoldaý azamattyń is júzinde jumysqa ornalasýyna baǵyttalady.

Negizgi ózgeristerdiń biri azamatqa jumyssyz mártebesi berilgenge deıin laıyqty jumys izdeý merzimin 2 kúnnen 13 kúnge deıin uzartý. Osy kezeńde mansap ortalyǵynyń mamandary azamattyń eńbek tájirıbesin, daǵdylary men qajettilikterin egjeı-tegjeıli anyqtaıdy, beıinin aıqyndaıdy, laıyqty bos jumys oryndaryn irikteıdi jáne jumys berýshilermen baılanys ornatady.

Osylaısha, azamattyń mansap ortalyǵyna júginýi tirkeý rásimi retinde qaralmaıdy. Bul azamatty jumysqa ornalastyrýǵa deıin súıemeldeýdi qamtıtyn tolyqqandy jumysqa ornalasý protsesi bolmaq. Onyń túpki maqsaty azamatty laıyqty jumysqa ornalastyrý.

Azamattar úshin bul ózine qajetti baǵyt boıynsha jeke keńes alýǵa, laıyqty bos jumys oryndarymen tanysýǵa, qajetti rásimderden ótýge jáne biliktiligine, tájirıbesine ári kásibı josparyna sáıkes keletin jumysty tańdaýǵa kóbirek múmkindik beredi.

Pılottyq joba jumyspen qamtý júıesin aldaǵy ózgeristerge praktıkalyq turǵydan daıyndaýdyń mańyzdy kezeńi bolady. Onyń barysynda mansap ortalyqtary men Memlekettik áleýmettik saqtandyrý qory fılıaldarynyń mamandary jańartylǵan jumys protsesteri men azamattarmen jumys isteý tártibi boıynsha qosymsha oqýdan ótedi.

Osy rette azamattyń beıinin sapaly anyqtaýǵa, laıyqty bos jumys oryndaryn irikteýge, ony jumysqa ornalasqanǵa deıin súıemeldeýge, jumyspen qamtýǵa járdemdesýdiń belsendi sharalaryn qoldanýǵa jáne jumys nátıjelerin aqparattyq júıelerde durys kórsetýge erekshe mán beriledi.

Pılottyq jobany ótkizý jańa tártiptiń tıimdiligin is júzinde baǵalaýǵa, qosymsha retteýdi qajet etetin máselelerdi anyqtaýǵa jáne óńirlerdi jańartylǵan tásilderge tolyq kóshýge daıyndaýǵa múmkindik beredi.

Pılottyq joba júzege asyrylatyn kezeńde jumysynan aıyrylýyna baılanysty áleýmettik tólem qoldanystaǵy tártip boıynsha tólenedi. Osy tólemdi alýǵa quqyǵy bar azamattar ony zańnamada belgilengen talaptarǵa sáıkes alý múmkindigin saqtaıdy.

— Tıisti ózgerister Áleýmettik kodeksine engiziletin túzetýlerde kózdelgen. Bul ózgerister 2026 jyldyń 11 maýsymda bekitilgen Qazaqstan Respýblıkasynyń Zańyna sáıkes engiziledi. 2027 jyldyń 1 qańtardan bastap jumysynan aıyrylýyna baılanysty áleýmettik tólemniń eń uzaq merzimi zańnamada belgilengen talaptarǵa sáıkes úsh aıǵa deıin bolady. Osylaısha, 2026 jyldyń 1 qazany — jumyspen qamtý qyzmetiniń jumysyn jetildirýge arnalǵan pılottyq kezeńniń bastalatyn kúni. Osy kúnnen bastap laıyqty jumys izdeý merzimi 13 kúnge deıin uzartylady. Al jumysynan aıyrylýyna baılanysty áleýmettik tólemdi tóleý merzimine qatysty ózgerister 2027 jyldyń 1 qańtarynan bastap kúshine enedi, — delingen habarlamada.

Zańnamadaǵy ózgerister kúshine engenge deıin Mınıstrlik elimizdiń barlyq óńirinde keń kólemde aqparattyq-túsindirý jumystaryn júrgizedi.

Bıylǵy jyldyń qazan-jeltoqsan aılarynda azamattarmen kezdesýler, konsýltatsııalar, mamandardyń sóz sóıleýi jáne túsindirý is-sharalary uıymdastyrylady. Olardyń negizgi maqsaty qazaqstandyqtarǵa aldaǵy ózgeristerdi, áleýmettik tólemderdi alý tártibin jáne jumyspen qamtý júıesi usynatyn múmkindikterdi aldyn ala ári túsinikti túrde jetkizý.

Ózgeristerdiń negizgi qaǵıdaty ózgerissiz qalady. Memlekettik qoldaý naqty adamǵa baǵyttalyp, barshaǵa qoljetimdi bolýy jáne azamattyń mártebe alyp qana qoımaı, ózine laıyqty jumys taýyp, turaqty jumyspen qamtylýyna múmkindik berýge tıis.

Budan buryn Qazaqstanda 2026 jylǵy I toqsanda jumyssyzdyq deńgeıi 4,5% bolǵanyn jazǵanbyz.