Endi júktilik pen bosanýǵa baılanysty tólemdi mobıldi qosymsha arqyly rásimdeýge bolady
ASTANA. KAZINFORM – Elimizde áleýmettik qoldaý qyzmetterin alý jeńildeı túspek. Bul týraly Eńbek jáne halyqty áleýmettik qorǵaý mınıstrligi habarlady.
Endi qazaqstandyq áıelder júktilik pen bosanýǵa baılanysty áleýmettik tólemdi úıden shyqpaı-aq, mobıldi qosymsha arqyly rásimdeı alady.
Bul –Eńbek jáne halyqty áleýmettik qorǵaý mınıstrliginiń áleýmettik qyzmetterdi tsıfrlandyrý jáne azamattarǵa kórsetiletin memlekettik kómekti barynsha qoljetimdi etý baǵytyndaǵy jumysynyń bir bóligi.
Buǵan deıin júktilik pen bosanýǵa baılanysty tólemdi rásimdeý úshin bolashaq anaǵa Halyqqa qyzmet kórsetý ortalyǵyna (HQKO) barýǵa, qajetti qujattardy jınaýǵa jáne ótinish berýge ýaqyt bólýge týra keletin. Endi bul qyzmetti onlaın alýǵa bolady. Sonymen qatar ótinishti burynǵydaı eGov.kz portaly arqyly elektrondy túrde berýge múmkindik bar.
Jańa qyzmettiń iske qosylýyna qatysty QR Eńbek jáne halyqty áleýmettik qorǵaý vıtse-mınıstri Bahtııar Jazyqbaev mınıstrlik azamattarǵa kórsetiletin qyzmetterdi barynsha jeńildetýge basymdyq berip otyrǵanyn atap ótti.
– Memleket kómekti azamattarǵa barynsha yńǵaıly ári qoljetimdi etý úshin barlyq qajetti sharalardy qabyldap jatyr. Basty maqsatymyz – qaǵazbastylyqty azaıtyp, adamdardyń memlekettik organdarǵa barý qajettiligin barynsha qysqartý. Ásirese júkti áıelder men jas analar úshin bul óte mańyzdy. Kúndelikti mıllıondaǵan qazaqstandyq paıdalanatyn mobıldi qosymsha arqyly qajetti qyzmetti alý – tsıfrlandyrýdyń naqty nátıjesi. Endi áleýmettik qoldaýdy alý burynǵydan da ońaı ári jyldam bola tústi, – dedi vıtse-mınıstr.
Júktilik pen bosanýǵa baılanysty áleýmettik tólemdi qashyqtan rásimdeý múmkindigi qazirdiń ózinde tolyq iske qosyldy. Jumys isteıtin jáne áleýmettik saqtandyrý júıesine qatysýshy áıelder ekinshi deńgeıli bank qosymshasyndaǵy «Gıd» bóliminen ótinish berý tártibi kórsetilgen qadamdyq nusqaýlyqpen tanysa alady.
Qyzmet – áleýmettik tólemderdi azamattardyń ótinishin kútpeı, aldyn ala taǵaıyndaýǵa múmkindik beretin proaktıvti qyzmetterdi damytý baǵytyndaǵy mańyzdy qadamdardyń biri.
Bul baǵyttaǵy basty maqsat – memlekettik qyzmetterdi alý úderisin barynsha jeńildetý, azamattardyń ýaqytyn únemdeý jáne áleýmettik qoldaýǵa muqtaj adamdarǵa qajetti kómekti yńǵaıly, jyldam ári ýaqtyly jetkizý.
Buǵan deıin júktilikke baılanysty áleýmettik tólemdi rásimdeýde qandaı qatelikter jıi kezdesetinin jazǵan edik.
