25 qańtardan bastap poıyzdarda ınternet paıda bolady
ASTANA. KAZINFORM — Zamanaýı spýtnıktik tehnologııalar arqyly poıyzdarda ǵalamtorǵa qoljetimdilikti qamtamasyz etetin pılottyq joba iske qosylady. Bul týraly «Jolaýshylar tasymaly» AQ baspasóz qyzmeti málim etti.
Belgili bolǵandaı, bul qyzmet eń aldymen jolaýshylar arasynda tanymal baǵyttardyń biri № ¾ «Astana-Almaty» poıyzynda júzege asyrylmaq.
— Pılottyq joba sheńberinde zamanaýı spýtnıktik tehnologııalardy paıdalanyp, poıyzdarǵa ǵalamtor qosý múmkindigi josparlanýda. Bul jolaýshylarǵa sapar barysynda WhatsApp, YouTube sekildi qosymshalardy erkin paıdalanýǵa jáne beınemazmundardy kórýge múmkindik beredi. Alaıda, torrentter men faıldardy júkteý saıttaryna shekteý qoıylatyn bolady. Jobanyń tehnıkalyq qoldaýyn Qazaqstandaǵy OneWeb-tiń resmı seriktesi Jusan Mobile júzege asyrady, — delingen ulttyq tasymaldaýshy kompanııanyń habarlamasynda.
Ǵalamtor qyzmetimen qatar, joba aıasynda jolaýshylarǵa qyzmet kórsetý sapasyn jaqsartý jáne poıyz brıgadasynyń jumysyn ońtaılandyrý úshin birqatar zamanaýı tehnologııalardy synaqtan ótkizý kózdelip otyr. Olardyń ishinde:
● Bıletterdi jyldam jáne yńǵaıly tekserýge arnalǵan jolserikterdiń mobıldi qurylǵylary;
● Vagon-meıramhanalarda qolma-qol aqshasyz tólem jasaýǵa múmkindik beretin POS-termınaldar;
● Qaýipsizdik deńgeıin arttyrý jáne qyzmettiń ashyqtyǵyn qamtamasyz etý úshin poıyz basshylaryna arnalǵan beınetirkeýishter;
● Vagondardaǵy jaǵdaıdy baqylaýdy kúsheıtý úshin ornatylatyn beınebaqylaý júıeleri.
Bul pılottyq joba Qazaqstannyń ózge baǵyttarynda ǵalamtor qyzmetin damytýǵa yqpal etedi.
Eske sala keteıik, buǵan deıin jolaýshylar poıyzdaryn jańartý deńgeıi qalaı júrgizilip jatqany týraly jazǵan bolatynbyz.