Endi jolaýshylardyń aty-jónindegi eki áripke deıingi qate tegin túzetiledi
ASTANA. KAZINFORM — 2026 jyldyń basynan bastap aty-jónindegi eki áripke deıingi qatelerdi tegin túzetýdiń jańa tártibi engizildi. Bul týraly Bas kólik prokýratýrasynyń baspasóz qyzmeti habarlady.
Azamattardyń ótinishterin taldaý barysynda áýe bıletterin rásimdeý kezinde teginde, esiminde jáne ákesiniń atynda ketken eleýsiz qateler úshin kóptegen aıyppul salynǵany anyqtaldy. 2025 jyly «Qazaq Air» AQ (qazirgi ataýy — Vietjet Qazaqstan) áýe kompanııasy 3 815 jolaýshynyń derekterin túzetken, olardyń basym bóligi — eki áripke deıingi qateler.
— Astana qalasynyń avıatsııalyq kólik prokýratýrasy áýe kompanııasynyń basshylyǵymen kezdesý ótkizdi. Kezdesý qorytyndysy boıynsha 2026 jyldyń basynan bastap aty-jónindegi eki áripke deıingi qatelerdi tegin túzetýdiń jańa tártibi engizildi, — delingen habarlamada.
Aıta ketelik qaıtarylmaıtyn ushaq bıletteri boıynsha ózgeris engizý usynylǵan edi.