Endi jeke qarajatqa túsirilgen fılmder de prokat aldynda saraptamadan ótedi
ASTANA. KAZINFORM — Elimizde «Kınematografııa týraly» zańǵa ózgerister engizý boıynsha usynystar ázirlendi. Bul týraly Mádenıet jáne aqparat mınıstrligi mádenıet komıteti kınematografııa basqarmasynyń jetekshisi Ǵanı Muratov málim etti.
— Memleket basshysy bıyl Býrabaıda ótken Ulttyq quryltaıda aıtqan tapsyrmasyna sáıkes, Mádenıet jáne aqparat mınıstrligi «Kınematografııa týraly» zańǵa ózgerister engizý boıynsha usynystar ázirledi. Bul ózgeristerge jeke qarajat esebinen túsirilgen fılmderdi qosa alǵanda, prokat aldyndaǵy saraptamadan ótkizý máseleleri kirip otyr, — dedi Ǵanı Muratov elordada otandyq fılmder taqyrybyna arnalǵan baspasóz máslıhatynda.
Onyń aıtýynsha, qazir atalǵan túzetýler kelisý satysynda.
— Otandyq kıno jyldam damyp keledi jáne derbes ındýstrııa retinde qalyptasty. Bizdiń strategııalyq maqsat — Qazaqstandy Ortalyq Azııadaǵy kınoóndiris ortalyǵyna aınaldyrý. Osy maqsatta biz memlekettik qoldaý júıesin jetildirýdi jáne kıno ındýstrııanyń negizgi qatysýshylaryn nyǵaıtýdy jalǵastyramyz, — deıdi ol.
Buǵan deıin endi elimizde prokatqa shyǵatyn fılmder qatań baqylanatyny týraly jazǵan edik.
Aıta keteıik, Qazaqstanda kınoǵa prokat quqyǵyn berýmen aınalysatyn saraptamalyq komıssııa qurylýy múmkin.