Endi zeınetaqy jınaǵyn 100% jeke kompanııaǵa berýge bolady
ASTANA. KAZINFORM - Qazaqstanda zeınetaqy jınaǵyn basqarý júıesine úlken ózgeris engizilgeli jatyr. Endi azamattar óz aqshasyn Ulttyq bankten alyp, tolyqtaı jeke kompanııalarǵa bere alady. Bul týraly Qarjy naryǵyn retteý jáne damytý agenttigi tóraǵasynyń orynbasary Nurjan Tursynhanov málimdedi.
Buryn jınaqtyń tek jartysyn ǵana jeke basqarýǵa berýge bolatyn. Endi salymshy óz aqshasyn 100% jeke kompanııaǵa aýdara alady.
Eń basty qorqynysh «aqshamdy jeke kompanııaǵa bersem, úı alýǵa nemese emdelýge shekti deńgeıden asqan aqshamdy paıdalana almaı qalamyn ba?» degen suraq edi.
Endi bul kedergi joıylady. Jeke kompanııadaǵy aqsha da Ulttyq banktegideı teń dárejede esepteledi.
Sondaı-aq jańa «mýltıportfel» júıesi engiziledi. Jastar óz aqshasynyń 80%-na deıin tabysy joǵary aktsııalarǵa salyp, jınaǵyn tez kóbeıtýge múmkindik alady.
Al zeınetke jaqyndaǵandar úshin táýekeli az, senimdi portfelder usynylady.
- Biz salymshynyń óz aqshasyn erkin basqarýyna múmkindik bergimiz keledi. Ol Ulttyq bank pen jeke kompanııa arasynda tańdaý jasaǵanda, bul onyń jınaǵynyń bir bóligin úı alýǵa nemese emdelýge paıdalaný quqyǵyna áser etpeýi tıis. Bul zeınetaqy aktıvterin basqarýdaǵy memlekettik monopolııany joıýǵa jol ashady, - dedi Nurjan Tursynhanov.
Aıta keteıik, buǵan deıin zeınetaqy jınaǵyn merziminen buryn alý talaby qatańdatylatynyn jazǵan edik.
