Endi Úsharal–Dostyq tasjolynda júrgizýshilerdi lazer súıemeldeıdi
ASTANA. KAZINFORM — Jańa júıe avtojoldyń 13-shaqyrymynda iske qosyldy. Onyń negizgi maqsaty — jol-kólik oqıǵalarynyń aldyn alý, sondaı-aq, ásirese, kóriný deńgeıi tómen jaǵdaılarda júrgizýshilerdiń zeıinin arttyrý, dep habarlaıdy Jetisý oblysy PD baspasóz qyzmeti.
Jetisý oblysynda jol qozǵalysy qaýipsizdigin arttyrýǵa baǵyttalǵan zamanaýı sheshimderdi engizý jalǵasyp jatyr. Osyndaı bastamalardyń biri — Úsharal–Dostyq baǵytyndaǵy respýblıkalyq mańyzy bar avtojolda lazerlik súıemeldeý tehnologııasyn qoldaný.
Jol jabynyna proektsııalanatyn lazerlik syzyqtar aıqyn vızýaldy baǵdar berip, júrgizýshilerge óz jolaǵyn durys ustaýǵa jáne uzaq jolda nazaryn joǵaltpaýǵa kómektesedi.
Atalǵan tehnologııa ásirese túngi ýaqytta tıimdiligin kórsetedi. Lazer sáýlesiniń aıqyn túsi júrgizýshiniń sharshaýyn azaıtyp, rólde qalǵyp ketý qaýpin tómendetedi — bul qala syrtyndaǵy joldarda jıi kezdesetin qaýipti faktorlardyń biri.
Polıtsııada atap ótkendeı, mundaı sheshimderdi engizý — jol-kólik oqıǵalaryn azaıtý jáne júrgizý mádenıetin arttyrý boıynsha júıeli jumystyń bir bóligi.
— Joldaǵy qaýipsizdik — bul tek baqylaý men jaýapkershilik qana emes, sonymen qatar zamanaýı tehnologııalardy engizý, — deıdi tártip saqshylary.
Osydan buryn Jetisýda mal urlaǵandar kóliginen aıyrylyp jatqanyn jazǵanbyz.
