Endi Ulttyq ulanda komandırlerdiń jumysy tsıfrlyq reıtıng arqyly baǵalanady
ASTANA. KAZINFORM – QR ІІM Ulttyq ulanynda áskerı bólim komandırleriniń qyzmetin avtomatty túrde baǵalaıtyn jańa tsıfrlyq júıe iske qosyldy.
Vedomstvonyń málimetinshe, jańa platforma qyzmettik-jaýyngerlik is-árekettiń negizgi kórsetkishterin jınaqtap, taldap, komandırlerdiń obektıvti reıtıngin qalyptastyrady.
Endi áskerı bólimderdiń qyzmetine qatysty barlyq aqparat biryńǵaı júıede óńdeledi. Bul naqty ýaqyt rejıminde joǵary nátıjeler kórsetilgen baǵyttardy anyqtaýǵa jáne qosymsha basqarýshylyq sheshimderdi qajet etetin salalardy jedel baqylaýǵa múmkindik beredi.
– Platforma Ulttyq ulannyń aqparattyq portalynda ornalastyrylǵan jáne baǵalaýdyń tórt negizgi baǵytyn qamtıdy: qyzmettik-jaýyngerlik jáne jaýyngerlik daıyndyq, tárbıe jumysy, tehnıkalyq jáne tyldyq qamtamasyz etý, sondaı-aq memlekettik qupııalardy qorǵaý deńgeıi, – dep habarlady Ulttyq ulannyń baspasóz qyzmeti.
Jańa júıeni engizýdiń mańyzdy nátıjeleriniń biri – qaǵaz qujat aınalymynyń qysqarýy. Buǵan deıin qajetti kórsetkishter ártúrli kózderden jınalyp, qolmen óńdelse, qazir barlyq málimet biryńǵaı aqparattyq keńistikte shoǵyrlandyrylǵan.
Tsıfrlyq platforma derekterdi avtomatty túrde óńdep, taldaý júrgizedi jáne qorytyndy nátıjeni reıtıng túrinde usynady. Bul basqarý úderisteriniń tıimdiligin arttyryp, komandırlerdiń ýaqytyn únemdeýge múmkindik beredi.
– Árbir komandır portaldaǵy jeke kabınetinde óz bóliminiń qyzmetiniń barlyq negizgi baǵyttary boıynsha kórsetkishterin qadaǵalaı alady. Al quqyqtyq tártip áskeriniń basshylyq quramy áskerı bólimderdiń jaı-kúıi týraly obektıvti aqparat negizinde jedel sheshim qabyldaý múmkindigine ıe bolady, – delingen habarlamada.
Vedomstvonyń málimetinshe, «Basshynyń reıtıngtik platformasy» Ulttyq ulandaǵy tsıfrlyq transformatsııanyń kezekti kezeńi sanalady. Júıe basqarý úderisteriniń ashyqtyǵyn arttyryp, áskerı tártipti nyǵaıtýǵa jáne áskerlerdi basqarýdyń tıimdiligin jańa deńgeıge kóterýge baǵyttalǵan.
Aıta keteıik, Ulttyq ulanda árbir 10-shy sarbaz kelisimshart boıynsha áskerı qyzmette qalady.
