Endi UBT sertıfıkatymen Malaızııa JOO-laryna túsýge bolady
ASTANA. KAZINFORM — Qazaqstannyń UBT sertıfıkaty Malaızııanyń Joǵary bilim mınıstrligi tarapynan resmı túrde tanylyp, el ýnıversıtetteriniń bakalavrıat baǵdarlamalaryna qabyldaý kezinde usynylatyn qujattar tizimine engizildi.
Ǵylym jáne joǵary bilim mınıstrliginiń baspasóz qyzmetiniń málimetinshe, bul qazaqstandyq talapkerlerdiń akademııalyq daıarlyǵyn baǵalaý júıesiniń halyqaralyq deńgeıde moıyndalýynyń mańyzdy kórsetkishi boldy.
Endi qazaqstandyq túlekter Malaızııanyń birqatar ýnıversıtetine mindetti Foundation daıarlyq baǵdarlamasyn ótpeı-aq, UBT sertıfıkaty arqyly oqýǵa túse alady. Sonymen qatar aǵylshyn tilinde oqytylatyn bilim berý baǵdarlamalaryna túsý úshin IELTS, TOEFL nemese balamaly sertıfıkattar arqyly aǵylshyn tilin meńgerý deńgeıin rastaý talaptary saqtalady.
— Malaızııa ýnıversıtetteri UBT boıynsha eń tómengi ótý baldaryn, sondaı-aq qabyldaýdyń qosymsha talaptaryn derbes aıqyndaıdy. Tańdalǵan bilim berý baǵdarlamasyna baılanysty talapkerlerden ishki emtıhan tapsyrý, suhbattan ótý, portfolıo usyný nemese daıarlyq kýrstarynan ótý talap etilýi múmkin. Osyǵan baılanysty Ulttyq testileý ortalyǵy talapkerlerge naqty ýnıversıtet pen bilim berý baǵdarlamasynyń talaptaryn aldyn ala muqııat zerdeleýdi usynady, — delingen habarlamada.
UBT sertıfıkatynyń halyqaralyq deńgeıde tanylýy qazaqstandyq bilimdi baǵalaý júıesiniń zamanaýı akademııalyq standarttarǵa sáıkestigin dáleldeıdi jáne otandyq túlekter úshin bilim alý múmkindikterin keńeıtedi.
Búginde UBT nátıjeleri tek Qazaqstan joǵary oqý oryndaryna túsý úshin ǵana emes, sonymen qatar Azııa elderi men basqa da halyqaralyq bilim berý baǵyttaryndaǵy sheteldik ýnıversıtetterge qujat tapsyrý kezinde de eskerilip keledi.
Sonymen qatar qazirgi ýaqytta ETS uıymymen birlesip ázirlenip jatqan Admissions Insight Test (AIT) atty jańa formattaǵy qabyldaý emtıhanyn engizý jumystary júrgizilip jatyr. Jańa emtıhan halyqaralyq testileý tájirıbesine sáıkes talapkerlerdiń akademııalyq jáne analıtıkalyq daǵdylaryn baǵalaýǵa baǵyttalady. Bolashaqta AIT emtıhanynyń da halyqaralyq bilim berý qaýymdastyǵy men sheteldik ýnıversıtetter tarapynan keńinen moıyndalýy josparlanyp otyr.
Osyǵan deıin elimizde UBT júıesi jańǵyrtylyp, pedagogıkaǵa túsý tártibi ózgeretinin jazǵanbyz.
