Endi Túrkistan óńirinde tabıǵı shyryn men balalar taǵamy shyǵarylady
ASTANA. KAZINFORM — Túrkistan oblysynda jemis-jıdekterdi tereń óńdeıtin zaýyt iske qosyldy, jemis pıýresi, alma untaǵy, sondaı-aq balalar taǵamyna arnalǵan ónimder shyǵarady, dep habarlaıdy Aýyl sharýashylyǵy mınıstrliginiń baspasóz qyzmeti.
Memleket basshysynyń aýyl sharýashylyǵy ónimderin tereń óńdeýdi damytý jáne otandyq shıkizattyń qosylǵan qunyn arttyrý jónindegi tapsyrmasy aıasynda óńirlerde ondaǵan ınvestıtsııalyq joba júzege asyrylyp jatyr.
Osy rette Túrkistan oblysynyń Túlkibas aýdanynda alma jáne ózge de jemisterdi tereń óńdeıtin zaýyt iske qosyldy. Kásiporyn 100 paıyz tabıǵı, qospasyz shyryn, jemis pıýresi, alma untaǵy, sondaı-aq balalar taǵamyna arnalǵan ónimder shyǵarýǵa baǵyttalǵan.
«Túlkibas jemis-jıdekteri» aýyl sharýashylyǵy óndiristik kooperatıvi zamanaýı óndiris standarttaryna saı keledi jáne Qytaıdan jetkizilgen jańa avtomattandyrylǵan jabdyqtarmen jaraqtandyrylǵan. Zaýyttyń jyldyq óndiristik qýaty 5 myń tonnaǵa deıin alma óńdeýge múmkindik beredi.
Qazir kásiporynda táýligine 30 tonnaǵa deıin alma óńdelip, Ayim brendimen shyǵarylatyn daıyn ónimder saýda jelilerinde satylyp jatyr.
— Kásiporyn tolyqtaı óz shıkizatymen qamtamasyz etilgen. 300 gektar aýmaqtaǵy alma baqtarynan jınalǵan ónimniń bir bóligi óńdeýge jiberilse, qalǵan bóligi syıymdylyǵy 2 myń tonnalyq kooperatıvtiń jemis saqtaý qoımasynda saqtalyp, qys mezgilinde naryqqa shyǵarylady. Aldaǵy ýaqytta zaýyt jergilikti baǵbandardan standartqa saı kelmeıtin almalardy qabyldap, óńdeýdi josparlap otyr. Bul aýdan fermerleri úshin qosymsha qoldaý bolmaq, — delingen habarlamada.
Buǵan deıin elimizde kartop, kókónis jáne jemis-jıdek saqtaıtyn oryndardyń jalpy syıymdylyǵy 2 371 500 myń tonna ekenin jazǵan edik.