Endi teri men jún eksporttaıtyn sharýalar kedendik baj salyǵyn tólemeıdi
ASTANA. KAZINFORM — Elimizde mal terisi men júnin shetelge shyǵarýǵa qoıylǵan kedendik baj salyǵy joıylady. Bul týraly Aýyl sharýashylyǵy mınıstrligi habarlaıdy.
Vedomstvonyń aqparatyna sáıkes, 2025 jylǵy 16 sáýirdegi syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń sheshimimen aýyl sharýashylyǵy mal terisi men júnin eksporttaýǵa salynatyn kedendik baj salyǵyn alyp tastaý maquldandy. Bul jeńildik 3 jyl merzimge engizilip, keıin qaıta qaraý múmkindigi saqtalady.
Sheshimge kelýdiń sebebi — ishki naryqta atalǵan shıkizatqa aıtarlyqtaı suranys joq. Atap aıtqanda, teri men júndi óńdeý jáne eksporttaý deńgeıi áli de tómen deńgeıde qalyp otyr.
Aýyl sharýashylyǵy taýaryn óndirýshilerdi yntalandyrý jáne óńdeý kásiporyndarynyń júktemesin qamtamasyz etý maqsatynda, óńdeýge ótkizilgen shıkizatqa sýbsıdııa berý túrinde memlekettik qoldaý sharalary qarastyrylyp jatyr.
Teri men júnge salynatyn eksporttyq baj salyǵyn alyp tastaý, eń aldymen, iri jáne usaq mal ósiretin fermerlerdiń shyǵyndary men qaldyqtardy joıýǵa jumsalatyn shyǵysty azaıtýǵa, óndiristik-bólý tizbekterin damytýǵa, ótkizý naryǵyn keńeıtýge, sondaı-aq aýyl sharýashylyǵy shıkizatyn óndirýshi jáne eksporttaýshy otandyq kásipkerlerdiń básekege qabilettiligin arttyrýǵa yqpal etedi.
Qazir Ulttyq ekonomıka mınıstriniń 2016 jylǵy 27 aqpandaǵy buıryǵyna sáıkes, qoldanystaǵy eksporttyq baj salyǵy mólsheri mynadaı:
• iri jáne usaq mal terileri men basqa da óńdelmegen terilerdiń eksportyna — tonnasyna 200 eýro;
• jún eksportyna — 10%, biraq tonnasyna keminde 50 eýro.
Іshki naryq qajettiligi men teri-jún eksporty arasyndaǵy teńgerimdi saqtaý maqsatynda Aýyl sharýashylyǵy mınıstrligi jaǵdaıdy turaqty baqylaýda ustap otyrady jáne qajet bolǵan jaǵdaıda óńdeý salasyndaǵy ınvestıtsııalyq jobalardy eskere otyryp, tıisti sharalardy jedel túrde qabyldaıdy.
Aıta ketsek, jyl basynda elimizde iri qara mal terisiniń 78%-y óńdelmeıtini jáne ol máseleni sheshý joly jaıly jazǵan edik.
Odan bólek, Qazaqstannyń mal terisin qaı elderge eksporttap otyrǵanyna sholý jasadyq.