Endi sot saraptamasynyń quny qalaı esepteledi
ASTANA. KAZINFORM — Qazaqstannyń Ádilet mınıstrligi sot saraptamasynyń qunyn esepteý tártibin jańartty. Tıisti buıryq 2026 jylǵy 21 qyrkúıekte qabyldandy.
Jańa qaǵıdalar memlekettik sot saraptamasy organdary men jeke sot sarapshylary júrgizetin saraptamanyń qunyn esepteý tártibin belgileıdi.
Saraptama qunyn eseptegende onyń túri men kúrdelilik sanatyna qaraı belgilengen ýaqyt normatıvi negizge alynady.
Memlekettik sot saraptamasy organdarynda saraptama quny birneshe shyǵynnan quralady. Oǵan sarapshynyń eńbekaqysy men soǵan baılanysty aýdarymdar, materıaldyq jáne ákimshilik-sharýashylyq shyǵyndar kiredi.
Sarapshynyń eńbekaqysy saraptama júrgizýge belgilengen ýaqyt normatıvin ortasha saǵattyq tarıftik mólsherlemege kóbeıtý arqyly esepteledi. Al aýdarymdar eńbekaqy shyǵyndary negizinde, belgilengen salyqtar men mindetti tólemder eskerile otyryp esepteledi.
Materıaldyq shyǵyndarǵa hımııalyq reaktıvter, shyǵys materıaldary, esirtki quraldarynyń, psıhotroptyq zattar men prekýrsorlardyń standartty úlgileri, sondaı-aq tıisti ádistemeler men shyǵys normalarynda kózdelgen ózge de materıaldar jatady.
Ákimshilik-sharýashylyq shyǵyndarǵa kommýnaldyq qyzmetter, ǵımarattar men úı-jaılardy, ınjenerlik ınfraqurylymdy kútip ustaý, jabdyqtardy paıdalaný, negizgi quraldar men materıaldyq emes aktıvterdiń amortızatsııasy, sondaı-aq ákimshilik-basqarý personalynyń qyzmetin qamtamasyz etý shyǵystary kiredi.
Bul shyǵyndar saraptamalar arasynda ýaqyt normatıvterine saı nemese eseptik kezeńde júrgizilgen saraptamalardyń jalpy sanyna qaraı bólinedi.
Memlekettik sot saraptamasy organy sarapshysynyń qorytyndysyna júrgizilgen zertteý qunynyń esebi qosa berilýge tıis.
Jeke sot sarapshylary úshin bólek tártip belgilengen. Ol saraptama bıýdjet qarajaty esebinen tólenetin jaǵdaıda qoldanylady. Al shyǵyndar taraptarǵa júktelse, saraptama quny shart negizinde aıqyndalady.
Bıýdjet qarajaty esebinen tólenetin jaǵdaıda jeke sot sarapshysy júrgizetin saraptamanyń quny ýaqyt normatıvi, sarapshynyń syıaqy mólsherlemesi jáne naqty zertteýge tikeleı baılanysty, qujatpen rastalǵan shyǵyndar eskerile otyryp esepteledi.
Mundaı shyǵyndarǵa materıaldyq shyǵyndar, kommýnaldyq qyzmet, baılanys pen úı-jaıdy jalǵa alý aqysy sekildi ilespe shyǵystar, sondaı-aq saraptama kezinde paıdalanylatyn negizgi quraldar men materıaldyq emes aktıvter boıynsha amortızatsııalyq aýdarymdar jatady.
Qujatta naqty sot saraptamasyn júrgizýge tikeleı qatysy joq shyǵyndardy onyń qunyna qosýǵa bolmaıtyny da kórsetilgen. Barlyq málimdelgen shyǵyn tıisti qujattarmen rastalýǵa tıis.
Eger saraptama júrgizý kezinde arnaıy jabdyq, zerthanalyq zertteýler, mamandandyrylǵan baǵdarlamalyq qamtamasyz etý nemese shyǵys materıaldary paıdalanylsa, soǵan baılanysty shyǵyndar da qujatpen rastalǵan shyǵyndarǵa jatqyzylady.
Zertteýge birneshe derbes nysan usynylsa nemese qoıylǵan suraqtar ártúrli saraptama túrine qatysty bolsa, qun ár nysan nemese tıisti zertteý túri boıynsha belgilengen ýaqyt normatıvi eskerile otyryp esepteledi.
Qun esebi jeke sot sarapshysynyń qorytyndysyna da qosa berilýge tıis.
Qosymsha saraptamanyń quny qosymsha zertteý kólemine, qoıylǵan suraqtar sanyna jáne olardy sheshýge qajet ýaqytqa qaraı aıqyndalady. Qaıtalama saraptama jalpy tártippen tólenedi.
Komıssııalyq nemese keshendi saraptama kezinde qun ýaqyt normatıvine, kúrdelilik sanatyna, zertteý nysandarynyń sany men materıaldardyń kólemine, tartylǵan sarapshylar sanyna, sondaı-aq qujatpen rastalǵan shyǵyndarǵa baılanysty bolady.
Jańa qaǵıdalar QR Ákimshilik quqyq buzýshylyq týraly kodeksi men Qylmystyq-protsestik kodeksine tıisti ózgerister engizilgennen keıin kúshine enedi.
Buǵan deıin Qazaqstanda sot saraptamasy salasynda máıitti kompıýterlik tomografııa arqyly zertteıtin vırtýaldy aýtopsııa jobasy jyl sońyna deıin iske qosylatyny habarlanǵan edi.
