Endi sheteldikter úshin Aııa-Sofııa meshitine kirý aqyly bolady

15 qańtardan bastap Túrkııanyń Ystambul qalasyndaǵy Aııa-Sofııa meshitine sheteldik týrıster úshin kirý aqyly bolady. Bul týraly Túrkııanyń Mádenıet jáne týrızm mınıstrligi málimdedi, dep habarlaıdy Kazinform NTV-ǵa silteme jasap.

Mınıstrliktiń málimdemesine sáıkes, Mádenıet jáne týrızm mınıstri Mehmet Ersoı bastaǵan Aııa-Sofııa meshitindegi qalpyna keltirý jáne konservatsııalaý jumystary aıasynda kelýshiler úshin daıyndalǵan 3-galereıadaǵy Ahmet sýburqaǵynyń aldynda ornalasqan bılet kassasy jumys isteıdi. Sondaı-aq sheteldik týrıster úshin Aııa-Sofııaǵa kelý úshin meshitke jeke esik bolady. Týr marshrýtynyń boıynda qaýipsizdik kameralary, órt habarlaý qurylǵylary jáne apattyq habarlandyrý júıeleri ornatylǵan.

Aqparatqa sáıkes, Aııa-Sofııaǵa barǵysy keletin sheteldik týrıster 25 eýro (shamamen 12 370 teńge) tóleıdi.

Mınıstrlik mundaı sheshimge 2023 jyldyń qazan aıynda kelgen. 2020 jyldyń shildesinde Túrik Memlekettik keńesi Mustafa Kemal Atatúriktiń Ystambuldaǵy Aııa-Sofııany murajaıǵa aınaldyrý týraly 1934 jylǵy jarlyǵynyń kúshin joıdy. Osydan keıin bul keshenniń meshit retinde paıdalanylatyny belgili boldy.

Aııa-Sofııa meshitke aınalǵanǵa deıin oǵan kirý tegin boldy. Túrkııa prezıdenti nysannyń mártebesin murajaıdan meshitke aýystyratyn bolsa, jyl saıyn 3 mıllıonnan astam adam keletin bul keshenge kirý barlyǵyna tegin bolady dep ýáde etken.

Anyqtama úshin: Bul ǵıbadathanany 360-jyly Vızantııa ımperatory Konstantın II salǵan. Ol aǵashtan salynǵandyqtan 404-jyly órtenip ketken. Sol jyly ǵıbadathana alǵash ret jóndeýden ótti. Meshittiń qazirgi ǵımaraty 532-537 jyldary Vızantııa ımperatory ıÝstınıan І-niń buıryǵymen salynǵan. Onyń qurylysy 5 jyl 10 aıǵa sozylǵan. Onda 10 myńnan astam qurylysshy eńbek etken.