Endi shaǵyn áýejaılarǵa beriletin sýbsıdııalar tsıfrlyq esepke alynady
ASTANA. KAZINFORM — Qazaqstanda kommýnaldyq menshiktegi áýejaılardy sýbsıdııalaý qaǵıdalaryna ózgerister engizildi.
Kólik mınıstriniń mindetin atqarýshynyń 2026 jylǵy 16 qyrkúıektegi № 254 buıryǵymen jańa normalar bekitildi.
Ózgerister jylyna 200 myńnan az jolaýshyǵa qyzmet kórsetetin jáne operatsııalyq shyǵyndaryn jabýǵa jetkilikti kirisi joq áýejaılarǵa qatysty.
Jańa qaǵıdalarǵa sáıkes, áýejaı operatory kúntizbelik jyl ishinde sýbsıdııa alý úshin aı saıyn jergilikti atqarýshy organǵa ótinim berýge tıis.
Qujattardy tıisti jyldyń alǵashqy jumys kúninen bastap 10 jeltoqsanǵa deıin qaǵaz nemese tsıfrlyq formatta tapsyrýǵa bolady.
Jergilikti atqarýshy organ túsken ótinimder men qujattardy qabyldaǵan kúnnen bastap bes jumys kúni ishinde olardyń tolyqtyǵyn jáne belgilengen talaptarǵa sáıkestigin tekseredi.
Eger qujattar toptamasy tolyq bolmasa, ótinim áýejaıǵa qaıtarylyp, onyń sebepteri kórsetiledi. Bul týraly habarlama da bes jumys kúni ishinde qaǵaz nemese tsıfrlyq formatta jiberiledi. Kemshilikter túzetilgennen keıin áýejaı ótinimdi qaıta bere alady.
Sonymen qatar, qaǵıdalarǵa tizilimdi júrgizýge tehnıkalyq qoldaý kórsetýge qatysty normalar engizildi. Bul jumysty bıýdjetti atqarý salasyndaǵy ortalyq ýákiletti organ aıqyndaıtyn, jalǵyz aktsıoneri memleket sanalatyn zańdy tulǵa júzege asyrady.
Memlekettik qoldaý sharalarynyń paıdalanylýyn monıtorıngteýge arnalǵan tehnıkalyq súıemeldeý eki deńgeıli júıe arqyly júrgiziledi. Birinshi deńgeıde salalyq tsıfrlyq júıelermen ıntegratsııalanǵan tirkeý júıesi jumys isteıdi. Ekinshi deńgeıde ótinimder qabyldanyp, óńdeletin memlekettik nemese memlekettik emes tsıfrlyq júıeler qarastyrylǵan.
Sondaı-aq ákimshilik akt qabyldanǵanǵa deıin ákimshilik rásimge qatysýshyǵa ákimshilik is boıynsha aldyn ala sheshimge qatysty óz ustanymyn bildirýge múmkindik beretin tártip engizildi.
Buıryq alǵash ret resmı jarııalanǵan kúnnen keıin kúntizbelik on kún ótken soń kúshine enedi.
Buǵan deıin elordanyń halyqaralyq áýejaıy teleskopııalyq basqyshty (jyljymaly jabyq dáliz-kópir) paıdalana otyryp, ishki reısterde jolaýshylardy otyrǵyz jáne túsirý qyzmetine shekti baǵany kóterýge nıetti ekenin jazdyq.
