«Endi sen — meksıkalyqsyń!»: Dımashtyń Monterreıdegi kontserti qalaı ótti
ASTANA. KAZINFORM — 14 qarashada Dımash Qudaıbergenniń Monterreıdegi alǵashqy kontserti ótti. Osylaısha, DIMENSIONS shoýy Meksıkanyń júregin jaýlaýdy jalǵastyryp keledi, dep habarlaıdy dimashnews.
Qazaqstandyq ánshige aıryqsha qurmet kórsetilip, kontsert boıy kórermender birneshe márte bir daýyspen «¡Dimash hermano, ya eres mexicano!» dep urandatty.
Bul — Meksıka halqynyń erekshe yqylasyna bólengen sheteldikterge degen súıispenshiligi men qurmetin bildiretin tanymal uran.
«Dımash, baýyrym! Endi sen — meksıkalyqsyń!» degen sózder «Bizge jaqyn ári qymbat bolǵanyń sonshalyq, seni ózimizdiń birimiz dep qabyldaımyz» degen maǵynany bildiredi.
Dımashty osylaısha baýyryna basqan jergilikti jankúıerler Qazaqstannyń memlekettik týlarymen fleshmob uıymdastyrdy. Kórermender kótergen shaǵyn jalaýshalar arenanyń ortasynda tutas kógildir aıdyn ispetti kórinis qalyptastyrdy.
Mádenıetter úndestigi men halyqtar arasyndaǵy jaqyndyq kórermenderdiń án arasyndaǵy úzilisterde ónerpazǵa tabystaǵan shaǵyn syılyqtarynan da baıqaldy. Máselen, qolyna Qazaqstannyń týyn ustaǵan meksıkalyq dástúrli shúberek qýyrshaq osyndaı yqylastyń bir kórinisi boldy. Budan keıin Dımash ta meksıkalyq tyńdarmandaryna mýzykalyq tartý jasap, mahabbat ánuranyna aınalǵan ıspan tilindegi «Historia de un amor» týyndysyn oryndady.
«Jasasyn Meksıka! Jasasyn Monterreı!» degen áýezdi urandar qazaq tilindegi ándermen qatar kórermenderdiń erekshe qoshemetine ıe boldy. Dımash ta tyńdarmandaryna jaqyndaı túsýge umtyldy. «Taý ishinde» ánin oryndaý kezinde zalǵa túsken Dımash jankúıerlerimen qushaqtasa án shyrqady.
— Dostar, bizdiń elderimizdi berik dostyq pen tamasha qarym-qatynas baılanystyrady. Búkil álemde de osyndaı qarym-qatynas ornasyn, — dep tilek bildirdi Dımash.
Osydan keıin ol ıspan tilindegi «Bésame mucho» ániniń taqyrybyna qurylǵan mýzykalyq varıatsııalardy asqan sheberlikpen oryndap berdi. Al kelesi kezekte «Dýrdaraz» ánin shyrqap, týǵan tilindegi repertýaryna qaıta oraldy.
Beıbitshilikke degen myzǵymas umtylys ıdeıasy ánshiniń avtorlyq «The Story of One Sky» kompozıtsııasynda jalǵasyn tapty. Dımash bul týyndyny bar jan-tánimen oryndap, tyńdarmandaryn tereń tebireniske bóledi. Al kórermender kompozıtor ári ánshi Dımash Qudaıbergenge oryndarynan turyp qol soqty.
— Mýzyka da — qarý. Alaıda ony izgi maqsattarǵa paıdalanýǵa bolady. Men árdaıym nashar ult eshqashan da bolmaıtynyn aıtyp júremin. Soǵyssyz álemdi armandaımyn. Álemde áli de beıbit ómirdi ańsaıtyn balalar kóp… Biz — baqytty jandarmyz, óıtkeni beıbit ómir súrýge múmkindigimiz bar. Kóptegen adam bizdiń ornymyzda bolýdy armandaıdy. Jaratqannyń raqymymen sizderdiń aldaryńyzda óner kórsetip, osy másele týraly aıtýǵa múmkindigim bar. Sizderge myń alǵys! — dedi ónerpaz.
Budan buryn Dımashtyń Meksıkadaǵy kontserti qarsańynda jankúıerler bas qosqanyn jazǵanbyz.