Endi respýblıkalyq bıýdjet tek iri jobalarǵa bólinedi
ASTANA. KAZINFORM — Úkimet pen jergilikti atqarýshy organdardyń ortaq mindeti jergilikti bıýdjetterdiń parametrlerin sapaly boljaý. Onyń barysymen Premer-mınıstrdiń orynbasary — Ulttyq ekonomıka mınıstri Serik Jumanǵarın tanystyrdy.
— Respýblıkalyq bıýdjetten jalpyulttyq mańyzy bar obektiler jáne asa mańyzdy ınfraqurylym qarjylandyrady. Qarapaıym tilmen aıtqanda, qomaqty qarjy talap etetin, joǵary áleýmettik-ekonomıkalyq tıimdilik beretin jobalar respýblıkalyq bıýdjetten qarjylandyrylady. Halyqtyń tirshiligin qamtamasyz etý úshin aldymen qajetti obektiler — jergilikti bıýdjet esebinen júzege asyrylady. Jalpy, sońǵy jyldary jergilikti deńgeıde salyqtardyń joǵary jınalýy osy tásilderdi iske asyrýǵa, respýblıkalyq bıýdjettiń júktemesin tómendetýge múmkindik berip otyr, — dedi Serik Jumanǵarın Májiliste ótken Úkimet saǵatynda.
Sonymen qatar mınıstr jergilikti bıýdjetterge qosymsha fýnktsııalardy, nysanaly transfertterdi bere otyryp, biraz únemdeımiz dep otyr.
— Úkimet pen jergilikti atqarýshy organdardyń ortaq mindeti jergilikti bıýdjetterdiń parametrlerin sapaly boljaý. Jalpy bizdiń baǵalaýymyz boıynsha, qabyldanǵan sharalardyń nátıjesinde memlekettik bıýdjet neǵurlym teńgerimdi bolady. Jergilikti bıýdjetter óńirlik deńgeıdegi mindetterdi sheshý úshin ózin-ózi qamtamasyz etedi, óz kezeginde respýblıkalyq bıýdjet damý mindetterin oryndaý qabileti artady. Memlekettik bıýdjettiń damý bıýdjetiniń 2026 jyly 15 paıyzǵa deıin jáne 2028 jyly 25 paıyzǵa deıin birtindep ulǵaıýyn kútemiz. Sonymen qatar, biz jergilikti bıýdjetterdiń salalyq saıasatqa sáıkestigin aıqyndaý maqsatynda olardyń shyǵystaryna sholý jumystaryn bastadyq. Mundaı talap Bıýdjet kodeksinde depýtattyq korpýs pen Joǵary aýdıtorlyq palata usynystary eskerile otyryp kózdelgen, — deıdi Premer-mınıstrdiń orynbasary.
Buǵan deıin habarlaǵanymyzdaı 2026 jyldan bastap turaqty kiristiń 40% jergilikti bıýdjetke jınalady.
Sondaı-aq Úkimet saǵaty barysynda el bıýdjetiniń úsh donor óńiri ataldy.