Endi iri qalalardan jer alǵandar aýktsıonnan túsken tabystyń bir bóligin bıýdjetke beredi

ASTANA. KAZINFORM – Astana, Almaty, Shymkent sııaqty qalalarda ıgerilmegen jer telimderin aýktsıon arqyly satýdyń tártibi ózgeredi. Bul týraly Májiliste astana men respýblıkalyq mańyzy bar qalalardy damytýǵa arnalǵan zań jobasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

— Zań jobasynyń ekinshi baǵyty jer máselelerin retteýdi kózdeıdi. Qoldanystaǵy tetik boıynsha jer ýchaskelerin talapqa sáıkes ıgermegen burynǵy ıeleri enshiles (afılırlengen) tulǵalar arqyly jerdi aýktsıon arqyly satyp alyp, ózinde saqtap qalady. Oǵan qosa aýktsıonnan kelgen aqsha da sol tulǵaǵa túsedi.
Budan basqa Jer kodeksine sáıkes ıgerilmegen jer ýchaskesi aýktsıonnan ótkizilmegen jaǵdaıda arnaıy jer qoryna esepteledi jáne ony odan ári paıdalaný múmkindigi joq, — dedi vıtse-premer.

Bul máselelerdi sheshý úshin Jer kodeksine mynandaı ózgeris engizý usynylyp otyr:

— ortalyq ýákiletti organǵa menshiktegi zańsyz jer ýchaskelerin qaıta resimdeý tártibin aıqyndaý quzyretin berý;
— burynǵy menshik ıesine ony satyp alý qunyn ǵana óteı otyryp, qaıtarylǵan jerlerdi ótkizýden túsken aıyrma tabysty bıýdjetke jiberý;
— buryn alynǵan jáne eldi mekendi damytýda paıdalaný úshin arnaıy jer qoryndaǵy jerlerdi qoldaný;
— buryn alynǵan jerlerdi qala qurylysy qyzmetine tartý múmkindigin keńeıtý.

Buǵan deıin Almaty ákimi Erbolat Dosaev turǵyndardy bıýdjet qarjysyna satyp alynǵan bir sotyq jer de jekemenshikke ótpeıtinine sendirgen edi.