Endi polıtsııa aýrýhanalardy táýlik boıy kúzetedi
ASTANA. KAZINFORM — Astana qalasynyń alty statsıonarynda medıtsına jumyskerleriniń qaýipsizdigin qamtamasyz etý úshin táýlik boıy qyzmet kórsetetin kúzet beketteri uıymdastyryldy. Bul týraly Qalalyq densaýlyq saqtaý basqarmasy málim etti.
Atalǵan shara patsıenttermen birge keletin adamdardyń medıtsınalyq personalǵa qol jumsap, zııan keltiretin jaǵdaılardyń jıileýine baılanysty qabyldanǵan.
Qoǵamdyq densaýlyq saqtaý basqarmasynyń habarlaýynsha, kúzetti ІІM júıesine kiretin Polıtsııa departamenti janyndaǵy mamandandyrylǵan kúzet qyzmetiniń mamandary qamtamasyz etedi.
– Medıtsına jumyskerlerin quqyqtyq turǵydan qorǵaýdy kúsheıtý jáne qaýipsiz eńbek jaǵdaılaryn jasaý maqsatynda Polıtsııa departamentimen birlesip táýlik boıy kúzet beketteri uıymdastyryldy. Polıtsııa qyzmetkerleri oqys oqıǵalar jıi bolatyn qabyldaý bólmelerinde kezekshilik qyzmetin atqaratyn bolady. Azamattardyń quqyqqa qaıshy keletin áreketteri týyndaǵan jaǵdaıda polıtsııa qyzmetkerleri olardyń aldyn alý úshin zań aıasynda áreket etýge quqyly. Sońǵy kezderi dárigerlerge qatysty negizsiz sıpattaǵy agressııalyq jaǵdaılar jıy bolady. Dáriger aýyr jaraqat alǵan Qostanaı oblysyndaǵy sońǵy rezonanstyq jaǵdaı osyndaı sharalardyń qajettiligin rastaıdy, – dep atap ótti Qoǵamdyq densaýlyq saqtaý basqarmasy basshysynyń orynbasary Qadyr Jarasbaev.
Búginde kúzet beketteri eresekterge arnalǵan úsh qalalyq kópsalaly aýrýhanada, №2 qalalyq balalar aýrýhanasynda jáne eki respýblıkalyq klınıkada uıymdastyryldy.
Jaqyn arada Polıtsııa departamentimen birlesip №1 jáne №3 kópsalaly balalar aýrýhanalarynda, sondaı-aq qalalyq perınataldyq ortalyqta kúzet beketterin ornatý máselesi pysyqtalyp jatyr.
Medıtsına jumyskerleri atalǵan bastamany qoldap, onyń qaýipsiz jáne turaqty jumys ortasyn qurýǵa yqpal etetinin atap ótti.
– Qaýipsizdik beketteri – bizdiń is júzinde qorǵalǵanymyzdyń belgisi. Qabyldaý bóliminde táýligine túrli jaraqattary bar, ártúrli jaǵdaıdy basynan ótkergen 400-ge jýyq adam júginedi. Biz patsıentterdiń ǵana emes, sonymen qatar olardyń týystarynyń da agressııasyna tap bolamyz. Barlyǵy shuǵyl kómekti qajet etedi, al medıtsınalyq kómek Triage suryptaý júıesi boıynsha júzege asyrylatyny eskerilmeıdi. Ár patsıenttiń ózindik «basymdyq dárejesi» bar. Biraq, ókinishke oraı, dárigerge degen qurmet joq, – dedi №2 kópsalaly qalalyq aýrýhananyń Qabyldaý bóliminiń meńgerýshisi Mádına Tabyldyqyzy.
Eske sala keteıik, Qazaqstan Respýblıkasynyń Prezıdenti Qasym-Jomart Toqaev fızıkalyq kúsh qoldanyp, medıtsına jumyskerlerine qatygezdik tanytqan úshin jazany qatańdatýdy tapsyrǵanyn jazǵan edik.