Endi PІB aýrýhanasynda kúrdeli operatsııalar úlken tiliksiz jasalady
ASTANA. KAZINFORM — QR PІB aýrýhanasynda jańa býyndaǵy angıografııalyq ortalyq jumys istep tur.
Qazirgi medıtsınada az jaraqattaıtyn, dáldigi joǵary jáne ár patsıentke jeke tásilmen em júrgizý ádisteri qarqyndy damyp keledi. Qazaqstanda mundaı zamanaýı tehnologııalardy engizýde QR PІB Medıtsınalyq ortalyǵynyń aýrýhanasy aldyńǵy qatarda. Aýrýhana bazasynda jańa úlgidegi angıografııalyq tehnologııalardyń referens-ortalyǵy jumys isteıdi. Ortalyq Siemens Artis Icono floor zamanaýı júıesimen jabdyqtalǵan. Bul qurylǵy dárigerlerge naýqas aǵzasyna túsetin júktemeni azaıtyp, kúrdeli operatsııalardy joǵary dáldikpen jasaýǵa múmkindik beredi.
Búginde angıografııalyq júıeler tek dıagnostıka jasaýǵa arnalǵan qurylǵy emes, operatsııa kezinde dárigerge dál baǵyt beretin zamanaýı tehnologııaǵa aınaldy. Dástúrli hırýrgııadaǵydaı úlken tilik jasaýdyń ornyna, endovaskýlıarlyq operatsııalar tamyr arqyly óte kishkentaı tesý ádisimen arnaıy kateterlerdiń kómegimen júrgiziledi.
— Rentgenhırýrgııanyń basty artyqshylyǵy — aǵzaǵa az jaraqat túsirýi. Patsıentke ashyq ota qajet bolmaıdy jáne narkoz sırek qoldanylady. Al qalpyna kelý ýaqyty áldeqaıda jyldam ári asqyný qaýpi tómen, — dep atap ótti QR PІB MO aýrýhanasynyń rentgenhırýrgııa bólimshesiniń meńgerýshisi Aleksandr Zemlıanskıı.
Bul júıe óte jyldam jumys isteıtin zamanaýı tehnologııaǵa negizdelgen. Arnaıy rentgenkontrastty zat engizilgennen keıin dárigerler qantamyrlardyń jaǵdaıyn naqty ýaqyt rejıminde joǵary dáldikpen kóre alady.
— Qarapaıym tilmen aıtqanda, biz tamyrlardyń ishki qurylymyn anyq kóre alamyz. Zamanaýı angıografııalyq qurylǵylar joǵary sapaly keskin kórsetip, qanaınalymyn baǵalaýǵa jáne tamyrdaǵy eń kishkentaı tarylýdy anyqtaýǵa múmkindik beredi, — dep túsindiredi Aleksandr Zemlıanskıı.
Aýrýhanada ornatylǵan Siemens Artis Icono floor júıesi júrek, mı jáne shetki qan tamyrlaryna jasalatyn operatsııalarǵa arnalǵan zamanaýı baǵdarlamalarmen jabdyqtalǵan. Barlyq júıe biryńǵaı tsıfrlyq ortada jumys isteıdi. Ortalyqtaǵy mańyzdy jańalyqtardyń biri — VFFR tehnologııasynyń engizilýi. Bul ádis qosymsha operatsııalyq aralasýsyz júrektegi qanaınalymyn baǵalap, tamyrdaǵy ózgeristiń qanshalyqty qaýipti ekenin joǵary dáldikpen anyqtaýǵa múmkindik beredi.
Sonymen qatar qurylǵy Aýrýhananyń PACS júıesimen tolyq baılanystyrylǵan. Sonyń arqasynda operatsııa kezinde angıografııa nátıjelerin KT jáne MRT derekterimen birge qarap, 3D-navıgatsııa qoldanýǵa bolady. Bul dárigerlerge kúrdeli klınıkalyq jaǵdaılarda sheshimdi dálirek qabyldaýǵa kómektesedi.
— Búginde rentgenhırýrgııa men ınterventsııalyq kardıologııa qarqyndy damyp keledi. Jańa quraldar men zamanaýı beıneleý júıeleri paıda bolyp, operatsııany dálirek ári qaýipsiz jasaýǵa múmkindik beretin tehnologııalar engizilip jatyr. Qazir biz osydan 10-15 jyl buryn óte qaýipti sanalǵan nemese múlde jasalmaǵan protsedýralardy oryndaı alamyz, — deıdi bólimshe meńgerýshisi.
Bul tehnologııalar ásirese egde jastaǵy adamdar men qatar júretin aýyr aýrýlary bar patsıentter úshin mańyzdy. Sebebi mundaı naýqastarǵa dástúrli ashyq operatsııa jasaý úlken qaýip týdyrýy múmkin.
QR PІB MO aýrýhanasy bul referens-ortalyqty tek em júrgizetin zamanaýı baza retinde ǵana emes, ǵylymı jáne bilim berý alańy retinde de damytyp keledi. Ortalyq jańa medıtsınalyq tehnologııalardy engizýge, qazaqstandyq mamandardyń biliktiligin arttyrýǵa jáne álemdik ozyq tájirıbeni keńinen qoldanýǵa baǵyttalǵan. Bul zamanaýı tehnologııalar men dárigerler tájirıbesiniń úılesimi halyq densaýlyǵyn jaqsartýǵa, ómir sapasy men uzaqtyǵyn arttyrýǵa múmkindik beredi.
Osyǵan deıin PІB Medortalyǵynyń dárigerleri Túrkistan oblysynda 28 kúrdeli operatsııa jasaǵanyn jazǵanbyz.
