Endi para ýáde etkender de jazalanady
ASTANA. KAZINFORM — Senat depýtattary «Qazaqstan zańnamasyna sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizetin zań men oǵan ilespe qujatty qarap jatyr.
Qujatty tanystyrǵan senator Andreı Lýkın bul zań eń áýeli Qylmystyq kodeksti jetildiretinin aıtty.
— Qylmystyq zańnamaǵa para usyný, ýáde etý jáne talap etý, sondaı-aq zańsyz syıaqy alýǵa arandatý úshin jaýapkershilikti kózdeıtin normalar engizilip jatyr. Sonymen qatar, sybaılas jemqorlyq quqyqbuzýshylyqtary boıynsha tergeý júrgizý jáne isterdiń tergelý tártibine qatysty máseleler jetildirilip keledi. Sondaı-aq, jekelegen sybaılas jemqorlyq quqyqbuzýshylyqtary úshin ákimshilik jaýapkershilik kúsheıtiledi. Atap aıtqanda, múddeler qaqtyǵysyn retteý jóninde sharalar qabyldamaý, sybaılas jemqorlyq qylmystar týraly habarlamaý jáne zańsyz materıaldyq syıaqy berý áreketteri úshin jaýapkershilik artady, — dedi ol.
Senat tóraǵasy Máýlen Áshimbaev zańdy qoldaný praktıkasynda paranyń ýáde etilgenin qalaı dáleldenetinin, mundaı tájirıbe qaı elderde bar ekenin surady.
Memlekettik qyzmet ister jónindegi agenttik tóraǵasynyń orynbasary Salaýat Múksimov mundaı normalar Sybaılas jemqorlyqqa qarsy memleketter toby (GRECO) jáne Ekonomıkalyq yntymaqtastyq jáne damý uıymyna (EYDU) múshe elderde qoldanylatynyn atap ótti. Postkeńestik keńistiktegi birqatar memlekette de osyndaı zań bar ekenin aıtty.
— Dáleldeý praktıkasyna kelsek, qylmystyq protseste de, azamattyq protseste de protsessýaldyq quqyq bar. Sol normalar boıynsha dálel kózi retinde protseske qatysýshylardyń kýálik etýi, jazbasha jáne zattaı aıǵaqtar, sarapshylar men mamandardyń qorytyndysy qoldanylady. Bul jerde para ýáde etý sáti laýazymdy tulǵaǵa aýyzsha málimdeme túrinde de, jazbasha habarlamalar arqyly da, onyń ishinde áleýmettik jeli men ınternet habarlamamen joldanǵan ýádeler arqyly da tirkele alady. Sot praktıkasy zań buzý faktisin dáleldeýdiń bazalyq prıntsıpterine súıenedi dep topshylap otyrmyz, — dedi agenttik ókili.
Buǵan deıin prokýratýra men sybaılas jemqorlyqqa qarsy qyzmetke qabyldaý erejesi ózgerýi múmkin ekenin jazǵan edik.
