Endi Ózbekstanda kámeletke tolǵan kvadroberler 15 táýlikke qamalýy múmkin
TAShKENT. KAZINFORM – Ózbekstanda kvadrobıng sýbmádenıetimen áýestenetin kámeletke tolǵandar endi 15 táýlikke deıin qamalýy múmkin, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstan ІІM Qoǵamdyq qaýipsizdik departamentiniń málimetinshe, kvadrobıng sýbmádenıetine elikteıtin jastar Ákimshilik quqyq buzýshylyq kodeksiniń «Usaq buzaqylyq» baby boıynsha jaýapqa tartylady. Atap aıtqanda, olarǵa 3-5 bazalyq eseptik shama aralyǵynda (88,5 dollardan 147 dollarǵa deıin) aıyppul salynady nemese 15 táýlikke deıin qamaýǵa alynady.
Vedomstvonyń baspasóz qyzmetinen atap ótkendeı, keıingi ýaqyttarda janýarlardyń betperdesin kıip, solardyń is-qımylyn qaıtalaıtyn jastar kóbeıe bastaǵan.
Máselen, Tashkentte kvadrobıng sýbmádenıetimen áýestenetin eki jasóspirim ıtke eliktep, adamdarǵa shabýyl jasaǵan. Tıisinshe, odan balalar men turǵyndar sekem aldy. Keıin quqyq qorǵaý organdarynyń qyzmetkerleri qoǵamdyq tártipti buzǵan turǵyndardyń ata-anasymen sóılesip, olarǵa bala tárbıeleý mindetin oryndamaǵany úshin 1,8 mln sým (shamamen 147 dollar) aıyppul salynýy múmkin ekenin eskertti.
Eske salaıyq, buǵan deıin Ózbekstannyń quqyq qorǵaý organdary kvadroberlerdiń ata-anasyna aıyppul salynatynyn eskertken edi.
Aıta ketsek, janýarǵa eliktep, sonyń is-qımylyn qaıtalap, daýysyn salyp, olardyń azyǵyn jeıtinder kvadrober dep atalady. Kvadrobıngtiń negizin qalaǵan - japondyq Kenıchı Ito. Ol 2008 jyly tórt taǵandap júrýden 18 sekýndta 100 metrdi baǵyndyryp, álem nazaryn ózine aýdardy. Keıin áleýmettik jeliniń arqasynda bul sýbmádenıet retinde kópke tanyldy.
